زنا المحارم :مهندس نمساوي

(أول حاجة خاصكم تعرفو المجهود اللي درت فهاد البوسط كبير بزااف بدون منة و بكل تواضع أنا هو أول شخص يحط هاد الوثائقي النادر مترجم بالعربية و اللي مكاينش فحتا موقع أو تطبيق للأفلام و حتا إلا لقيتيه غادي تلقاه بدون ترجمة إلا فالنيتفليكس)
قبل متعرفو القصة بغيت نسمع الجواب ديالكم على واحد السؤال مهم حيث الرأي ديالكم كيهمني، تصور تكون عندك بنتك كتختلف معاك تماما في طريقة التفكير و فإختيار أسلوب الحياة مثلا أنت متدين و محافظ و بنتك متحررة كتضرب ميني-جوب أو العكس أنت ملحد و بنتك متدينة و منقبة كيفاش غادي تتعامل معاها؟؟ واش غاادي تفرض عليها أسلوب حياة معين بزز و بالإكراه!!! و لا غادي تعطيها الحرية في الإختيار؟؟
هاد القصة كتبين لأي درجة ممكن شي أب يكون مكيرحمش فقط حيث الإبنة ديالو اختارت تعيش كيف بغات هي ماشي كيف باغيها هو تعيش و كتبين فنفس الوقت فين ممكن الكبت الجنسي يوصل الواحد و يحول الإنسان لوحش مكيرحمش حتى أقرب الناس ليه، تصوروا معايا هاد السيد اللي فصورة لتحت و اللي سميتو "جوزيف فريتزل" سد على بنتو "إليزابيت" فواحد الغرفة عازلة للصوت تحت الموبل ديالو لمدة 24 سنة و تكرفص عليها مئات المرات و ولدات منو 7 الأولاد، إييه 7 الأطفال ولداتهم بوحديتها بدون مساعدة طبية و واحد منهم مسكين مات و هو رضيع شدو هاد المجرم فريتزل و حرقو و ثلاثة من الأولاد كان حابسهم معاها تحت الأرض معمرهوم مشافو الشمس دوزو سنوات تحت الأرض كريستين 19 سنة ستيفان 18 سنة فليكس 5 سنوات و ثلاثة أبناء اليكسندر و ليزا و مونيكا طلعهوم لفوق و تبناهم على أساس ولادو ، إليزابيت دوزات هاديك 24 عام تحت الأرض و ناس عايشين فوقها اللي كاريين الشقق و مفراسهوم والو و سكان المدينة ديالها "انشتتن" بالنمسا كيسحابليهم انها مختفية فشي دولة أوروبية حيث الأب ديالها كان بلغ عن إختفائها و روج أنها مخطوفة من طرف مافيا الجنس ،فالوثائقي كتسمعو القصة بالتفصيل و كيفاش تربا الكبت فهاد المجرم منذ الصغر ملي تأثر بالنازية و اليمين المتطرف و واخا كان متفوق فالدراسة ديالو و صارم مكاين لا بنات لا سكس كيعرف غير المدرسة و الدار هادشي اللي غادي يخليه أول علامات الكبت تبان (عقدة أوديب) و ملي ولى شاب بدا كيحاول يغتصب النساء أكثر من مرة و فالأخير بانت ليه فبنتو حيث هي الوحيدة فبناتو ألي كانت كترد عليه الهدرة و باغية تختار تعيش حياتها يما يوافق تفكيرها هادشي اللي متقبلوش جوزيف.....
سنة 2005 تصدمو سكان دولة النمسا و العالم بهاد القصة و غير الزهر اللي فضح هاد المجرم ملي مرضات كريستين ناضت ايزابيت كتطلب فيه يديها للسبيطار و ملي مشات للسبيطار تفضح كلشي ( من هاد الحادثة تم إقتباس قصة فيلمroom) تم الحكم على فريتزل بالمؤبد و تم الحجز على المبنى اللي كانت عايشة تحت منو إليزابيت 24 سنة من الإغتصاب و التجويع و الضرب.

Anonymous MasSaktinch+18