صاحب الدماغ العبقري التي خسرته المغرب و ربحته السويد

بعد 11 سنة في خدمة المغرب قرر الرحيل

من هذا الرجل .. اكيد رأيتموه يا مغاربة في برنامج اخطر المجرمين .. لكن اغلبكم ﻻ يعرفه جيدا
انه رشيد_المناصفي الناجح صاحب الدماغ العبقري التي خسرته المغرب و ربحته السويد .. ﻻن المغرب تدعم الفاشل وﻻ تهتم بالناجح للاسف .. عمرتوا لنا البﻻد بالشيخات و العباقرة كتسرقهم الدول العظمى التي تستحقها

إليكم قصته :

#رشيد_المناصفي

عندو 50 سنة ولد في قنيطرة لأب رباطي وأم سلاوية، هو كاتب ، وخبير دولي فعلم الإجرام ، ومحلل نفسي ، وباحث فموضوع التطرف الأصولي ، ومحقق مُعترف بخبراته للي كتبنّاها حكومات و شركات فمجموعة من دول العام
تابع دراسته بشعبة القانون فجامعة محمد الخامس فالرباط ، ومنين وصل لـ 23 سنة قرر يسافر حول العالم بدا بجزر الباليار فإسپانيا ، وحيت كان من عائلة ميسور تمكن من زيارة عدد كبير من الدول
.. استقر فالسويد وختص فمجال الاجرام على خطى والده لي كان رجل شرطة ، واصل دراسته فالمهجر وتعلم مجموعة من اللغات فحال : الفرنسية ، الانجليزية ، الدانمركية ، السويدية ، النرويجية ، الروسية .. ونجح فدراسته بشكل كبير لدرجة اشتغل فالبرلمان السويدي و فمديرية الامن ، وحتى فالمحكمة الابتدائية بالإضافة لمنصب بالوزارة المكلفة بالهجرة ..
من بعد كثر من عشرين سنة قضاها فالمهجر قرر يرجع للمغرب كإبن غيّور على بلده باش يشارك خبرته مع أبناء وطنه . و ينفع بلده
رجع للمغرب فرِحًا مسرُورً ، حسابليه غايستقبلوه بتمر والحليب بحال نانسي عجرم و هيفاء وهبي ولكن يا فرحة ما تمّت ، لقى راسو بحال الاطرش في الزفّة ، حيت المغاربة عندهم مشاغل اهم من هاذ التحقيق ولعب الدراري . عندهم موازين و مشغولين يهزو نجوى كرم فوق العمارية و يضورو بها .. مشغولين بسعد المجرد و قضيته.. الخ من تفاهات ضيعات مستقبلنا ،
المهم من بعد فترة سهل الله وضبّر على خدمة عرفوه المغاربة من بوابة برنامج " أخطر المجرمين " اللي كان كيعمل فيه كمحلل خبير فعلم الاجرام ، المناصفي بقدرة قادر أسس شركة دياله للأمن الخاص، واشتغل كمحقق بعيدا عن اعين القانون ، مقابل 60 يورو عالأقل فالساعة ، اما ايلا كان الملف خارج المغرب، فالمقابل المادي للخدمات كيتضاعف عشرات المرات ..
كان كايحقق فكل شي فحالات الإختفاء المفاجئ ، الاختطاف القسري ، السرقة الموصوفة ، الخيانة الزوجية ، النصب
و الإحتيال ،.. الخ
المناصفي ليس رجلا عادي كيما عرفوه المغاربة فسلسلة اخطر المجرمين ،
انما هو الرجل يمكن لينا نطلقو عليه لقب شيرلوك مغربي بامتياز ، هو سهل ممتنع عندو علاقات دولية واسعة ، صحابه من النفوذ وأبرز مثالين هوما الرئيس الفرنسي الاسبق فرونسوا هولاند للي ثنا عليه فاكثر من مرة ، بالاضافة للرئيس التونسي القايد السبسي ..
توجهت ليه دعوة رسمية من البيت الابيض تلاقى من خلالها بشخصيات بارزة فحال باراك اوباما وجون
ماكين ، و كاترينة كاتروس .
رشيد المناصفي هو اول عربي افريقي ، تمكن من الحصول على الجائزة الأولى فمسابقة المسدس الذهبي، التي تنضمها امريكا ، هذه المسابقة تتمحور بالأساس حول إجراء المتنافسين لمباريات فالرمي بأسلحة مختلفة، شارك برفقة 160 متباري من خيرة القناصة فالعالم ، و استطاع يتفوق على جميع ويحصل على هاذ الجائزة المهمة ،
..
بالاضافة لك هذا النجاح و اﻻنجاز العظيم.. المناصفي عنده مؤلفات مترجمة لمجموعة من اللغات ، ودائما فنفس الموضوع ديال علم الاجرام ، ولعل ابرز كتبه هو كتاب “الجريمة والتشرميل” 2014 « Crimes et Tchermil »
كتاب فريد قدم فيه الكاتب للقارئ وصفات للحماية والرد على أنواع مختلفة من التهديدات الى تلقاها من مصادر مجهولة ، كايوضع بين يديه حلول باستعمال العقل وبالتحري والتحقيق ..
رشيد سخط بزاف على الوضع فالمغرب ، سياسيا واقتصاديا وتنمويا وفخطوة غريبة اقترح على رئيس المجلس البلدي بالقنيطرة عزيز الرباح يكري ليه مدينة القنيطرة بأكملها ،
باش يتكلف هو بإصلاحها، الطلب قوبل بالرفض اكيد ،
ومن تم والرجل كايعاني التبخيس والتهميش لدرجة فماي الفائت قرر يهاجر المغرب بشكل نهائي وبدون رجعة بسبب امتعاضه من الوضع فالبلاد.
وترك رسالة وضح فيها الاسباب اللي خلاتو يقدم على هاذ الخطوة رغم حبه للمغرب اللي كايقول انه ودعه مكرها لا مُخيرا . . وجا فالرسالة بشكل مختصر
"بعد تفكير عميق، قررت طي صفحة من حياتي،
أعلن لكم بكل حسرة، قرار رحيلي عن أجمل بلد في العالم "
..قال انه مباشرة بعد رحيله من السويد للمغرب حاول يغير شي حوايح فحدود المستطاع لكن فكل مرة يصطدم بالاذان الصماء ، و فالرسالة عبر على غضبه وامتعاضه من رؤية وزراء ومسؤولين غير أكفاء كايسيروا بلاده ، وختاصر النقاط للي كايشوف فيها بؤرة الخلل وللي أجبرته على الهجرة بدون عودة، فعدة نقاط من بينها :
..
– المراسلات:
كايقول لاكثر من 11 سنة، وأنا كنراسل مجموعة من الشخصيات السياسية ، باش نوضع خبرتي رهن اشارتهم
بدون حتى ما يردو عليا ، فماشي هكا كايتم التعامل
مع الناجحين ،
..
– الفقر :
كايقول انه تصدم بنسبة الفقر للي كيتزايد رغم توفر الدولة على امكانيات عديدة توفر بيها عيشة افضل للمغاربة .
.
– التعليم :
كايقول بان التعليم الخاص كايغذي الفوارق الطبقية .
وخص ثورة حقيقية فالمنظومة
.
– الصحة :
عندو مقال طويل كايترجى فيه المسؤولين يعيدو النظر
فهاذ المجال المتدهور فالبلاد والكارثي .
.
– الرشوة :
كايقول بان الدولة متساهلة فهاذ الجانب .. ومايمكنش ليه يقعد فبلاد خصو ضروري يعطي "لحلاوة" باش يقضيو ليه مصالحه
.
– اللا عدالة – اللاأمن :
كايقول ليس بالقوة نقضي على الجريمة لكن بالذكاء
منين كتعنف القوات العمومية الأساتذة، الأطباء، الطلبة،
ففين راه الأمن والعدالة فهاذ الحالة.
..
– اللامساواة ،
تكلم على ناس كتقضي المصالح ديالها غير بالمعرفة شي للي كايغيب النزاهة ، وعطا مثال بكيفاش لي سرق بيضة كيدخل للسجن وللي سرق الملاير عايش حر .
..
فاخر الرسالة ختم بـ " أيها المغاربة، أتمنى لكم حظا افضل "
ووجه رسالة للمسؤولين كايقول فيه
" لن نسامحكم فقد أجبرتمونا على هجرة بلدنا "
وهكا طوى صفحة مغرب " باك صاحبي " نهائيا و عاد للسويد بلد الحق و القانون و العدالة