بزاف منا كايضغط على واليديه فهاد الفترة باش يشري حاولي من فئة السردي او البرغي و للاسف بزاف ديال الوالدين كايزيرو راسهم باش يقدرو يوفروو المتطلبات ديال الابناء ديالهم ، كاتلقاه لحيتو واصلا الارض السابعة و قرجوتو كبر من غار حراء و رجليه كبر من الرجلين ديال باه و كايمشي عندو بدون حشمة و يقوليه ( الواليد بغينا حولي كبير) وهادشي كامل باش يضرب معاه سيلفي و يحطها ف انستغرام بعنوان (ديالنا كبر من ديالكم ) ، خاصك تعرف ا صديقي و صديقتي بلي هاد الفترة فاش وللا كايجي العيد متزامنة مع الصيف يعني ها مصاريف السفر او الخرجات زيد عليهم الحوايج بالنسبة للناس لي كايشريو الحوايج من العيد ل عيد و زيد عليه مصاريف د الدخول المدرسي و اصلا كاتلقا بنادم كاع مازال ماسلا من كريديات ديال رمضان و كايجي العيد الكبير وكايعلقو من الحنجرة ، و هنا اوجه رسالة ل الشباب المغربي ، تكيسو علا واليديكم ، سيرو هضرو معاهم و قولو ليهم يجيبو كبييش على قد الحال باش يدوزو دوك اليوامين و باش يتسماو دارو الفريضة ومن بعد كملو ف سيستيم الغذائي ديالكم العادي ، راه داك اللحم د الغنمي يوميا لمدة شهر كايضر الجهاز الهضمي د بنادم ، و لي ماعندوش باش يعيد بلا مايحس براسو محكور ، بالعكس اشنو غايطرا كاع ايلا ماعيدتيش ؟؟ واش نهاية العالم ، حتى دوك الجمعيات لي كايشريو حوالا للناس كون غي يعطيوهم فلوس باش يشريو لولادهم الكتب المدرسية و يستنفعو بيهم اما القطبان و القديد ف نهايتهم مجاري الصرف الصحي ، وفالتالي ايلا ماكنتيش قادر تشري الاضحية و غايخصك تسلف و تكلف ف من الاحسن تشد لارض وماتعقد ما والووو ، للمشكل هو ايلا بقيتي بجووع لا لحم لا دجاج لا خضرة تما عاد غادي يخصك المساعدة ديال بصاح حيت غادي تكون كاتعاني قبل العيد او بعده و بحال هاد الحالات خاصنا نعاونوه ونلقاو ليهم الحل الابدي ماشي من العيد ل عيد كانتفكروهم ب حاولي و كانخليوهم ضايعين !!!المساعدة كاتكون على دور العام ماشي فالمناسبات ..
0 تعليقات
أكتب لتعليق