الواقية من الشمس بشكل ادق الاشعة الفوق البنفسجية و قد اعذر من انذر.

عمركوم متسألتو علاش بنادم كيولي حمر و جلدة كتحرقو ملي كيتعرض لأشعة الشمس بكثرة؟
و كيفاش كتحدث عملية البرونزاج لي النهار و ماطال بنادم مقيل فالبحر ولا لبيسين ولا فالسطح غا باش يتبرونزا؟
اجيو تشوفو معايا علاش.
كولنا كنعرفو بلي الصيف فين كتزها القضية، الجو كيتشمش، البحر و لي بيسين كيعمرو، الدراري بشورط، دريات بدو بياس ولا بوركيني، و لكن علاش ملي كتبقا مسرطح فشمس بزااف كتولي حمر و جلدة كتحرقك؟
Sunburn suck
كولنا كنعرفو ان العامل الرئيسي فاحمرار الجلد هو اشعة الشمس، و لكن الا زدنا دققنا فهاد الاخير كيوقع بسبب الاشعة الفوق البنفسجية ultraviolets لي فاشعة الشمس، فاش هاد الاشعة U.V كتضرب الجلد مع مرور الوقت كتوقع ضرر على بعض الكتل الاساسية ديال الحمض النووي لي فالسطح (DNA Basic Blocks) , ملي كيوقع ضرر الجسم ديالك كيحاول يتخلص من دوك الخلايا الميتة و يصلح الكتل بخلايا اخرى و هاد العملية كتسمى Apoptosis .
و باش الجسم ديالك يحميك من دوك الاشعة كيفرز مادة سميتها الميلانين Mélanine, هاد المادة الدور ديالها امتصاص ديك الاشعة، و هاد المادة نفسها هي لي كتعطي اللون البني او الاسود للبشرة ديال الانسان، كيما كنعرفو السود عندهوم البشرة بنية مائلة للسواد داكشي علاش كتلقاهوم واخا يبقاو الليل و ما طال فالبحر مكيطرا ليهم واالو على عكس الشخص لي كتلقا الجلدة ديالو بيضة بحال پاپيي طواليط كيبقا غا ساعة فالبحر كيولي ماطيشة.
رجوعا لتضرر البشرة ملي كيتضررو دوك الكتل الاساسية ديال dna داك الضرر كيخلف RNA لي كتم فعملية استبدال خلايا ميتة بأخرى حية apoptosis, فهاد العملية العروق كيوليو كبار باش يولي تدفق الدم بكميات اكبر الشيء لي كيعطي ديك الحمورية لي هي فالاصل Inflammation التهاب للجلد لي كيتلخصو فحروق الجلد AKA، غادي تقوليا علاش كيولي تدفق الدم بكميات اكبر؟ حيتاش الجسم كيكون فحالة حرجة و كيحاول يصلح دوك الخلايا المتضررة بأخرى حيتاش كون يبقاو دوك الخلايا غادي يوليو خلايا مسرطنة، لي تقدر تسبب فسرطان، و كولما الانسان بقا معرض بكثرة لدوك الاشعة الفوق البنفسجية كولما كانت امكانية الاصابة بسرطان اكبر لهذا اخي ملي تمشي للبحر متمشيش كي شي مدرم ضروري دي معاك la crème solaire الواقية من الشمس بشكل ادق الاشعة الفوق البنفسجية و قد اعذر من انذر.