خبر زوين وسط الاخبار البئيسة : كل المعلومات لي تلزمك فى قرعة أمريكا العشوائية

كل المعلومات لي تلزمك ل"قرعة أمريكا العشوائية" .. مع الإجابات على كل الأسئلة لي تقدر تطيح فراسك .. الموضوع طويل ولكن غيكون شامل ..
"الهجرة العشوائية" كيوفر الفرصة ل 50-55 ألف شخص من مختلف أنحاء العالم (من غير الدول المحظورة) الطريقة الوحيدة للتقديم هي تعمر النموذج الإلكتروني المجاني والمتوفر فموقع وزارة الخارجية الأمريكية .. فترة التسجيل كتبدا من اليوم لغاية 7 نونبر .. والنتائج غيبانو فشهر ماي 2018 .. 
#شروط_المشاركة .. تكون عندك كثر من 18 عام وتكون من دولة من الدول المسموح لها بالهجرة .. ماشي شرط وماشي مهم تكون ماكاتعرفش للانجليزية .. وماشي مهم يكون عندك كونط فالبنك وماشي مهم تكون عندك العائلة ف"امريكا" ..
#كيفية_التقديم .. هذا هو الموقع الرسمي والوحيييييد واي موقع آخر راه موقع نصاب أو غير صحيح .. الموقع الرسمي راه كيتسد العام كامل وكيفتح فقط فوقت التسجيل فشهر اكتوبر ..
https://www.dvlottery.state.gov/(S(03l1zfktau52pgukcdzdg0gb))/default.aspx
الناس المزوجين وباغين يشاركو يقدرو يعمرو جوج استمارات باش يربحو جوج فرص للفوز .. لي مزوجين وباغين يدفعو غتذكر عدد وأسماء افراد الاسرة القاصرين الغير متزوجين تحت سن 21 سنة .. واخا مايكونوش باغين يهاجرو اما الأبناء المزوجين او فوق 21 عام بلا ماتذكرهم .. ايضا لا كان لمراتك/راجلك اولاد آخرين تحت 21 عام خاص تذكرهم كذلك فالطلب ..
شنو هي #أسباب_الرفض .. السبب الأشهر ولي كيطيحوا فيه بزاف ديال الناس هو كيعمرو أكثر من طلب ظنا منهم انها بهكذا طريقة كيضوبلو فرص الفوز .. خطأ .. بمجرد تعمر الطلب الثاني كيتلغاو بجوج مباشرة + انك ماتدخلش البيانات بشكل صحيح او ماتذكرش بيانات معينة + الصورة وهذا مشكل حتى هو كيطيحو فيه بزاااااف ديال الناس بمجرد ماتكون الصورة غير موافية للمعايير الطلب كيترفض مباشرة ونهضر عليها لانها مهمة بزاف.
(( ابعاد الصورة (العرض والطول) تكون 600×600 بيكسل ... حجم الصورة مايفوتش 240 كيلوبايت وتكون الصورة JPEG ماتكونش شي صيغة اخرى وتكون الصورة على خلفية بيضاء ... الصورة تكون من بداية منتصف الصدر حتى الرأس وتكون الرأس شادة حوالي 50% من مساحة الصورة ... الوجه والاكتاف يكونوا مواجهين تماما للكاميرا ... ماتضحكش ف الصورة ولا تبسم ويكونو عينيك مفتوحين ماشي ناعسين .. ومايكونش الظل لا فالخلفية ولا فجوانب الوجه بحيث الوجه يكون واضح ... ممنوع تلبس كاسكيط او اي لباس رسمي من غير لي كيتعلق بمعتقدات دينية (كالحجاب مثلا) فهو مسموح ... منين تتصور قول للمصور يعطيك نسخة منها خليها عندك ف USB وتكون بمقاس 600×600 بيكسل .. تكوم الصورة جديدة ومامخدوماش بالفوطوشوب )) 
بعد ماتدير هاذ الشي غتدخل الصورة فهاد الموقع وغتشوف واش مطابقة للشروط ولا لا ...
http://www.greencardphotocheck.com/en/
ندوزو دابا ل #خطوات_التقديم_و_المشاركة_خطوة_خطوة ..
غتدخل لموقع الهجرة العشوائية لي كيف قلنا هو الوحيد ديال الهجرة .. منين تكمل خطوات التسجيل غتحتافظ برقم التسجيل "confirmation number" باش تعرف واش فزتي ولا لا عبر نفس الموقع .. فحالة مشى ليك تقدر تعرفو بإدخالك لبريدك الالكتروني لي تسجلتي بيه ..
#شرح_أسئلة_استمارة_الهجرة_العشوائية_بالتفصيل ..
● الإسم بالكامل و من الافضل دخلو كيف مكتوب ف"الباسبور" ..
● تاريخ الميلاد .. "يوم/شهر/سنة" ركز انك تكتبو صحيح لأنه لا يمكن تعديله
● الجنس..ذكر/أنثى
● مدينة الميلاد (مسقط الرأس)
● بلد الميلاد
● البلد المؤهل للاشتراك في برنامج الهجرة العشوائية ( غتلقى سؤال هل بلدك الذي ولدت به من البلدان المؤهلة .. مثال .. بلادك المغرب وهي مؤهلة غتختار "نعم" وبلا ماتجاوب على السؤال لي موراه ولي كيهم مثلا مغربي مولود ف "السعودية" او "جزائري" مولود ف"الكويت" ..)
● صورة المتقدم .. كيف شرحت تكون بنفس المعايير وفهاذ الخانة كتتحمل فقط صورة المتقدم يعني لا كان مزوج تصاور الزوجة والولاد من بعد
● العنوان البريدي .. كتب العنوان بشكل صحيح لانه كيتسجل عندهم فقاعدة البيانات .. الرقم البريدي ماكانش عندك ماشي مشكل ..
● مكان الإقامة الحالي .. تكتب العنوان لي ساكن فيه حاليا
● رقم الهاتف .. اختياري
● عنوان البريد الالكتروني .. مهم جدا..بيه غترجع رقم تأكيد الطلب فحالة ضيعتيه .. وخاصك تعرف انه ماغايوصلك فيه حتى رسالة من "إدارة الهجرة الأمريكية" تقوليك راك ربحتي ولا لا ... ولكن تقدر من خلاله متابعة حالتك بعد فوزك بانك ترسل رسائل ل"إدارة الهجرة" ..
● ما هو أعلى مؤهل دراسي حصلت عليه حتى يومنا هذا .. غتختار أحد الاختيارات التالية ولي كتمثل أعلى مؤهل دراسي .. (1) مستوى التعليم الثانوي "مازلت تدرس ولم تتخرج بعد" ... (2) شهادة التعليم الثانوي high school degree "تخرجت من الثانوية وحصلت على الشهادة" ... (3) مدرسة مهنية vocational school "خريجي المدارس الصناعية والتجارية والزراعية" ... (4) بعض الدروس الجامعية "تخرجت من معهد سنتين" ... (5) شهادة جامعية university degree "تخرجت من الجامعة وحصلت على شهادتك" ... (6) شهادة الماجستير master degree "حصلت على شهادة الماجستير".
(7) شهادة الدكتوراة phd degree "حصلت على شهادة الدكتوراة".
● الحالة الإجتماعية .. أعزب/متزوج/مطلق/أرمل/منفصل قانونيا ( لا كنتي متزوج غتكتب متزوج وغيحولوك لصفحة اخرى باش تكتب بيانات زوجتك وتحميل الصورة ديالها..وكتب كل المعلومات المطلوبة على اسرتك كيف ذكرت لفوق ..)
● عدد الأولاد (للمتزوجين) .. الطلبات خاص يكون فيها اسم وتاريخ ومكان ميلاد الزوجة وجميع الاطفال تحت 21 سنة والغير متزوجين
● بيانات الزوج/الزوجة (للمتزوجين) .. ضروري تعمر بيانات الزوجة ولو تكون حريمي ومعول لا جات فيك القرعة ناوي تطلق مراتك .. فحالة ماعمرتيش طلبك كيتلغى
● بيانات الأبناء (للمتزوجين) .. الاسم/تاريخ الميلاد/الجنس/بلد الميلاد/مدينة الميلاد/صورة ... بعد ماتسالي وتسجل الطلب "submit" غيعطيوك رقم التأكيد "confirmation number" .. رقم مهم جدا احتفظ به وفشهر ماي 2018 دخلو فالموقع باش تعرف فزتي ولا لا ..
#الأوراق_المطلوبة_فحالة_فزتي ..
● صور المتقدم .. فحالة كان مزوج صورjه مع صور أفراد الأسرة المسافرين
● شهادات الميلاد مترجمة
● شهادتك المدرسية لي دفعتي ليهم .. مترجمة
● للمتزوجين .. عقد زواج مترجم
● شهادة خبرة مترجمة فحالة كنتي تتوفر عليها
● صور جواز السفر "الباسبور".
#الأسئلة_لي_كتطيح_فراس_اي_واحد_دفع_للقرعة ..
س .. وزارة الخارجية الامريكية كتعلن على الفائزين على شي موقع او كترسل النتائج فالبريد الالكتروني؟
ج.. لا أبدا باغي تعرف راسك واش نجحتي كتدخل لموقع الهجرة لي شاركتي فيه وتدخل رقم المشاركة ديالك وتعرف النتيجة الخاصة بك.
س .. فحالة جات فيا القرعة المقابلة فالسفارة غتكون بلونجلي؟
ج .. لا المقابلات كتكون باللغة العربية
س .. انا متزوج وجات فيا القرعة غنسافر بوحدي؟
ج .. غتسافر بوحدك كمرحلة اولية باش تمهد تجيب مراتك وولادك عندك بشرط يكون اللحاق ف فترة "الفيزا" وهي 6 شهور
س .. فحالة جات فيا القرعة غادي يوفرو ليا عمل تما؟
ج .. لا لي كيربح فالقرعة ويمشي لتما كيعول على راسو..
#تحذير_مهم ..
غيبانو هاذ ليام مواقع كتقوليك انها كتضاعف فرص فوزك في القرعة مقابل بعض المال ... كذب في كذب فقط مواقع نصابة ... دفع ف الموقع الرسمي وتسنا زهرك....