الحديث أثناء النوم أسبابه وأعراضه

كتكون ناعس عادي ماعليك مابيك حتى كتفيق كتقولك مك ولا باك راك كنتي كتهضر فنعاسك، كتبقى تقول كيفاش كنهضر فنعاسي وانا معارفش وبلا منشعر، كنظن كلكم وقعات معاكم هاد القضية ولكن معرفناش شنو السبب فهادشي...نمشيو للموضوع باش نعرفو..

"الحديث أثناء النوم" أو "التكلم النومي" هو واحد الاضطراب كيوقع لبنادم فاش كيكون ناعس كيخليه يبدى يهضر غير بوحدو وفنفس الوقت راه ناعس وماواعيش بداكشي لي كيقول وفاش كيفيق مكيعقل على والو ومعارفش كاع واش كان كيهضر فنعاسو ولا لا واغلب الهضرة لي كيقولها الانسان فنعاسو كتكون على شي موضوع هضر فيه بزاف ولا شي بلان وقع معاه، مثلا كنتي مضارب مع شي حد ملي غاتنعس تقدر تبدى تسب فنعاسك وتغوت...

هاد اضطراب التكلم النومي مكيكونش عند كاع ناس لا لا، كيكون بزاف عند الرجال ودراري صغار، هاد الاضطراب معندوش اعراض باش تعرف راسك واش غايوقع ليك ولا لا، يعني ايلا كان ناعس حداك شي حد هو لي غيقولك واش كنتي كتهضر فنعاسك ولا لا..

هاد الاضطراب النومي كيتسبب فشي حوايج خرين بحالاش ؟ بحال رهاب النوم و تقدر تمشى فنعاسك ويقدر يتقطع فيك النفس ويقدرو يوقعو ليك اضطرابات نفسية خرى مع المدة،..شناهي الاسباب ديال هاد الاضطراب النومي ؟ كيقولو بلي الانسان فاش كيحلم كيبدى يهضر باش يتفاعل مع السيناريو لي كيشوف فالحلمة وداك الحوار وديك الهضرة لي كيقولها فالحلمة كيقولها فالواقع..

كيقولو بلي الناس لي كيهضرو فنعاسهم اغلبهم كتكون عندهم مشاكل صحية وكاينة اسباب خرى بحال فاش كتستعمل دواا ديال نعاس والمسكنات لي كيعطيوها بعض الاطباء للناس اما باش يقدرو ينعسو ولا باش ينقصو من الألم ومن الاسباب الرئيسية فهاد الاضطراب النومي كاين الضغط النفسي يعني اغلب ناس لي كيهضرو فنعاسهم كيعانيو من ضغوط نفسية بحال ناس لي عندهم امتحانات وناس لي كيبغيو يدوزو شي انتخوتيان ديال شي خدمة بالاضافة للحمى حتى هي كتسبب فهاد الاضطراب حيت ارتفاع درجة الحرارة كتخلي الانسان يتهلوس فنعاسو ويبدى يهمهم...

الناس لي عندهم امراض نفسية هوما اكثر الناس لي كيهضرو ويتمشاو فنعاسهم والناس لي مبليين بالشراب حتى هوما نفس الشيء هاد الناس لي كيشربو بزاف ديال لحوايج كيخبيوهم ولكن فاش كيوقع ليهم هاد الاضطراب كيعتارفو بكولشي فنعاسهم بدون وعي، كاين سبب خر هو التعب، الناس لي كيعياو بزاف فخدمتهم ولا قرايتهم كيتصابو بهلوسة التمتمة وكيبداو يتمتمو فنعاسهم...

هاد الاضطراب ماعندوش اضرار على الشخص المصاب ولكن يقدر يخلع الناس لي ناعسين حداه ويبرزطهوم وميخليهمش ينعسو على خاطرهم، العلماء ملقاوش شي تفسير مأكد لهاد الاضطراب ولكن كيقولو بلي السبب فهادشي راجع للاجهاد الجسدي والقلق النفسي، يعني السبب ديال هاد الاضطراب محصور فالقلق والخوف والتوتر والمشاكل فالخدمة والقراية...الخ هاد الامور كلها كتخلي الانسان يهضر فنعاسو وكتسبب فحوايج خرين يقدر يتمشى فنعاسو ويقدر يبول فحوايجو حاشاكم بلا مايشعر...

واش كاين شي علاج لهاد الاضطراب ؟ اه كاين علاج خصك غير توكل عالله، اولا ايلا بغيتي تعالج ومتبقاش تهضر فنعاسك خصك تخوي راسك من الضغوط النفسية والمشاكل لي عندك، وتبقى تمارس السبور قبل ماتنعس بساعة، بالاضافة لتمارين التنفس وتمارين الاسترخاء بحال اليوغا باش تخوي راسك من التوتر والقلق وخصك تنسى المشاكل ديالك وماتبقاش محكر عليها وتفكر فيها وخصك كل ليلة تشرب كاس ديال الحليب قبل ماتنعس باش تهدأ الاعصاب ديالك وخصك تلبس حوايج نعاس لي غترتاح فيهم يعني شي حاجة خفيفة وأخيرا مرة مرة تقرى القرآن باش ترتاح نفسيا..

موهيم هادشي لي كاين حاولت نعطيكم فكرة على الموضوع ونتمنى يكون فالمستوى والسلام عليكم في موضوع آخر طهلاو..