"الجـــــامـــوفــــوبيـــــا" الخــــــوف مـــن الــــزواج.

"الجـــــامـــوفــــوبيـــــا" الخــــــوف مـــن الــــزواج.

بزاف ديال الناس ولاو كيخافو من الزواج، ومكيبغيوش يبينو داك الخوف للناس لي ضايرين بيهم سوا عائيلاتهم سوا صحابهم وكيبداو يخلقو شي أعذار باش يدافعو على ريوسهم ويدافعو على السبب لي مخلاهومش يتزوجو وكيبداو يقلبو على السبة باش يقنعو بنادم ويتهربو من الزواج...علاش هاد الناس كيخافو من الزواج ؟..نمشيو للموضوع.

"الجاموفوبيا" أو "فوبيا الزواج" أو "الخوف من الزواج" هو واحد المصطلح كانسميوه على الناس لي كيخافو من الزواج، هاد "الجاموفوبيا" هو واحد الخلل رهابي فالنفسية ديال بنادم هاد الخلل طبعا خارج على الإرادة ديال بنادم يعني كيتخلق فبنادم انطلاقا من تجارب أو تأثيرات خارجية عاشها ولا تأثر بيها، هاد الجاموفوبيا كيتصابو بيها الجنسين بجوج وكيأثر عليهم وكيخلق عندهم واحد الخوف من الزواج لدرجة هاد الناس يقدرو يبقاو حياتهم كلها بايرين...

هاد الجاموفوبيا كيخلي بنادم يتهرب من الزواج والمسؤولية وحتى بالنسبة للي مزوج حتى هو نفس الشيء كيبدى يحس بالضغط النفسي وبلي مامرتاحش وميقدرش يكمل فديك العلاقة هنا كينوض يخلق شي سبة باش يدير حد لهاد العلاقة يقدر يمشي يطلق ويقدر يهرب ومايرجعش...علاش هاد الناس كيخافو من الزواج ؟ وعلاش كيتصابو بهاد الجاموفوبيا ؟...السبب بسيط، كلنا كنعرفو ان التجارب لي عاشها بنادم سوا لي عاشها شخصيا سوا لي تآثيرا بيها من طرف ناس خرين كلها كتخلق واحد البوان فالنفسية ديال بنادم زائد داك التعاويد والحكايات والمشاكل ديال الناس لي ديجا مزوجين ومتفاهموش وسالاو بالطلاق هادي كلها أمور كتسبب لينا فالجاموفوبيا...كيفاش ؟

نت مثلا عندك شي صاحبك مزوج وديما كيشكي عليك على مرتو بلي كتخونو ولا حصلها مع شي حد ولا يبدى يقولك الزواج غير صداع الراس والمرض ناري ليكوش والحليب يوميا..ناري المسؤولية صعيبة اخويا بزااف عليا اخويا مالي عليها نبقى غير ديال راسي حسن وواحد النهار ناض طلق، نت اوطوماتيكيا راك تأثرتي بهاد السيد وكاع داكشي لي قالك وتدمر عليك وشكى عليك هاد الامور كلها كتخلق لك واحد الصورة فالنفسية فذاتك وكتبقى هكا تال واحد النهار غيقولو لك الدار خصك تزوج نت اوطوماتيكيا غادي ترفض حيت ديجا خديتي واحد النظرة سلبية على الزواج وراكوم كتشوفو الاغلبية دابا اي واحد سولتيه على الزواج غيقولك صداااع الراس ماشي حيت تزوجو وعاشو التجربة انما حيت سمعو الناس كيعاودو على الزواج فيه صداع ومشاكل وبلي آخرتها كتسالي بالطلاق بالإضافة للمشاكل الاسرية لي كيشوفو فالتلفازة هكا الناس كاتخلق عندهم واحد النظرة فنفسيتهم كتسبب ليهم فالخوف من الزواج من بعد..شنو هي الاسباب ديال هاد الجاموفوبيا ؟

الاسباب بسيطة، بنادم كيبدى يحس براسو مقادرش على المسؤولية وهكا كيتخلق عندو واحد الارتباك والقلق وبالتالي كيبدى يتهرب وكيبدى يدير السبة بالمادة بلي خصو خدمة خصو فلوس خصو دار وطوموبيل وكيبدى يدير السبة بالوقت وحتى ايلا كانت كاع هاد الظروف متوفرة غيبدا يدير السبة تاني بلي باقي صغير وبلي مكاينينش بنات الناس وبلي خصو الوقت باش يوجد ويحفظ القوالب ديال الزواج الى اخره هاد الامور كلها كتخلق هاد الجاموفوبيا فبنادم ولكن السبب الحقيقي هو الخوف، بنادم كيخاف لا يفشل فالزواج وهاد الخوف من الفشل طبعا ماجاش غير هكاك...علاش ؟

هاد الخوف عندو مرجعيات كثيرة من بينها المشاكل والتجارب لي تآثيرا بيها هاد الشخص فحياتو سوا فالطفولة سوا فالمراهقة بحال الطلاق ديال واليديه اما لسبب من الاسباب ولا الطلاق ديال شي حد قريب ولا صديق أو أو أو، ولا داكشي لي كيسمع هاد الشخص مثلا كيعاود ليه شي صاحبو بين قوسين ( كيقوليه المرا خصها لي يشبعها ويقنعها ويلا ماقنعتيهاش غادة دير فيه من وراك وتخونك ووو يعني خصك تكون بحال هكا خصك تكون راجل خصك هادي وهادي...الخ ) ولا عاود ليه على شي حد وقع ليه نفس البلان، هنا هاد الشخص كتخلق عندو واحد الصورة فنفسيتو وكيحس براسو مغيقدرش يحقق داك الإكتفاء العاطفي والجنسي لديك السيدة لي غيرتابط بيها وغيتحرج معاها وغيولي ضحية وبالثالي كيقول بناقص وكيبدا يتهرب من الزواج....

ونفس الشيء بالنسبة للدريات مثلا شي درية طلقو واليديها ولا هرب عليها باها هاد الدرية مع المدة كتولي تخاف من الزواج حيت غاتولي تخاف لايخليها داك الشخص لي غاتزوج بيه كيفما دار باها مع مها، يعني هادشي مكيجيش غير هكاك هاد الخوف مبني على التجارب لي عاشها بنادم وتآثيرا بيها فواحد المرحلة من حياتو...

الأعراض ديال هاد الجاموفوبيا كتبان فبنادم ملي كيكون قريب يتزوج كيبدى يتعرض للظغط النفسي والقلق والبكاء والإكتئاب والتعرق والغثيان وهادشي كامل كيديرو ليه داك الخوف لي فيه وديك الحساسية من الزواج وكتقول بعض الدراسات بلي الناس لي مامزوجينش كيكونو اكثر عرضة للإكتآب كثر من الناس لي مزوجين...واش كاين شي علاج لهاد الجاموفوبيا ؟..آه كاين هاد العلاج هو انك خصك تواجه ذاتك وتعبر على المخاوف ديالك باش تخرج من ديك الدوامة ديال الخوف باش تقدر تسيطر على نفسك وهادشي باش تغسل اللاوعي ديالك من الماضي وديك الافكار السلبية لي جمعتيها على الزواج وباش ثيق فراسك وملي تزوج غاتقدر تكمل فديك العلاقة بيخير وعايش آليز وبلا متسول لي مزوجين حيت ببساطة كل واحد وكيفاش كيعيش حياتو وفالنهاية هاديك حياتك وهاديك حياتهم....موهيم هادشي لي كاين درت هاد الموضوع بناء على الطلب وحاولت نعطيكم فكرة حتى نتوما على هاد الموضوع كنظن غينفعكم فحياتكم وعلى الاقل غتكون عندكم فكرة عليه..على العموم تقبلو منا المجهود واخا الموضوع طويل شوية سموحات وكالعادة نتقاشعو فشي موضوع خر...بيس

بقلــم: الـﺴـــــــﺎﻋــــﺮ