اشنو هو هاد البيتكوين : كل شيئ تود معرفته عن عملة البيتكوين ......

"البيتكـــــــــويــــن" العملــــــــة الــــرقميــــــــــة.

هاد ليامات كتراث الهضرة على هاد العملة وتمنعات مؤخرا فشي دول من بينها المغرب ولكن علاش ؟ وشنو هي هاد العملة ؟ ولاش كتصلاح ؟..نمشيو للموضوع

مؤخرا ولاو بزاف ديال الناس كيتعاملو بهاد العملة وهاد الازدياد فالاستخدام ديال هاد العملة خلا ماليها يزيدو فالسعر ديالها وهادشي خلا الدولة والسلطات يمنعوها ويمنعو التعامل بيها فالمغرب واي واحد استعملها غادي يتعرض لعقوبات حبسية وغايخلص غرامات مالية وبلي خص التعامل فالبيع والشرا يكون بطريقة تقليدية يعني بالفلوس الحقيقية والأبناك والعملات الاجنبية اما العملة الإلكترونية او الرقمية سوا "البتكوين" سوا العملات الرقمية لخرين مبقاش مسموح بيها واي واحد تجرأ يتعامل بيها غادي يتعاقب....اشنو هو هاد "البيتكوين" ؟

"البيتكوين" هو واحد العملة رقمية إلكترزنية مشفرة مافيها لا سيري لاوالو وماعندها لا مؤسسة مالية لا والو، هاد العملة هي باش كنتعاملو فالأنترنيت فالبيع والشرا وكيتعتابر هاد البيتكوين أغلى عملة فالعالم والسعر ديالها واصل لكثر من 8000 دولار امريكي وكاينين عملات رقمية خرى بحال "إثيريوم" لي واصل السعر ديالها ل364 دولار و"ليتكوين" لي واصل السعر ديالها 70 دولار وعملات خرين بحال "الريبل و المونيرو والريو" ولكن اكثر عملة كيتعاملو بيها هي هاد البيتكوين حيت غالي بزااف ومنتاشر بزااف فالعالم...

هاد العملة اختارعها واحد السيد ياباني سميتو "ساتوشي ناكاموتو" ف 2007 والهدف منها هو نتخلصو من ديك المراقبة ديال السلطة المركزية لتداول العملات يعني العملة تخرج من اطار مراقبة الحكومات وف 2009 بداو الناس يتعاملو بيها...هاد العملة يالاه ضربات 9 سنين تقريبا باش بانت واحتلات المرتبة اللولة وطيحات السوق على كاع العملات التقليدية بيما فيها الدولار والأورو وفاش بداو العملات التقليدية كيتراجعو الناس بداو يتعاملو بهاد "البيتكوين" الشيء لي خلاها تصدر المقدمة رغم انها عملة رقمية...

هاد عملة "البيتكوين" من الاشياء لي زوينة فيها انها مستقلة ديال راسها وسريعة الاستخدام بلا ماتمشي للبانكة غير ب"كلي يوسبي" ولا بيسي ديالك، كما انها ماتابعة لحتى شي مؤسسة بنكية او مالية وماتابعة لحتى شي دولة...هاد البيتكوين كاين منها اكثر من 5 مليون وحدة وكل وحدة كتساوي اكثر من 8000 دولار والمجموع ديال هاد العملة فالعالم كيساوي اكثر من 135 مليار دولار...كيفاش يمكن ليا حتى انا نتعامل بالبتكوين ؟

باش حتى نت يكون عندك "البيتكوين" خصك تقلب عليه بحال الفلوس العادية باش تجمع فلوس خصك تمشي تدمر وتعري على كتافك ونفس الشيء بالنسبة للبيتكوين...كيفاش ؟ باش يكون عندك البيتكوين خصك تخدم عليه من خلال مايسمى بالتنقيب الافتراضي مثلا تبدى دير برمجيات فالأنترنيت ولا تشري هاد البيتكوين بالفلوس التقليدية مثلا عندك 100 دولار يمكن ليك تشري بيها البيتكوين من المتاجر الالكترونية لي كتصرف الدولار والعملات التقليدية للبيتكوين...ومن غير هادشي يمكن ليك تربح البيتكوين من بزاف ديال المواقع مثلا بحال المواقع ديال الاعلانات والاشهارات ويمكن ليك تربح البيتكوين بطرق خرى بحال الفوطوشوب ايلا كان عندك مع التصميم وكتصاوب فيديوات وابداعات خرى يمكن لك تبيعهم فبعض المواقع بحال "بيتيت" ويمكن لك تكتب مقالات بالانجليزية ولغات خرين وتخلص عليهم فشي مواقع بحال "باستكوين" ويلا كنتي معروف ومشهور فمواقع التواصل الاجتماعي يمكن ليك تربح البيتكوين من بعض المواقع بحال "شانج تيب" و"ميلاو أدس" ومواقع خرى ومن بعد يمكن ليك تصرف هاد البيتكوين لعملة نقدية...

عملة البيتكوين انتاشرات فالعالم وعتارفو بيها بزاف ديال الدول على رأسها ميريكان والمانيا وكندا والبرازيل والنمسا...الخ وفنفس الوقت كيعارضوها شي دول بحال الصين وبعض الدول العربية بحال السعودية والمغرب السعيد...وكيعاارضوها كاع البنوك التقليدية وكيعتابروها تهديد وخطر حيت مامسؤول عليها حتى شي بنك مركزي ومامراقباش وهادشي خلق رعب فبعض الحكومات حيت فهاد العملة مكاين لا ضرائب لاوالو والحكومات خايفين لا يتعاملو بيها الناس حيت هي كتعتابر كنوع من التهرب من الضرائب وحيت ايلا كولشي تعامل بيها الحكومات مغيقدروش يراقبوها ومغيقدروش يراقبو الارباح ديال الشركات والافراد حيت هاد العملة كيف قلت ليكم مامسؤول عليها حتى شي بنك مركزي على عكس العملات التقليدية لي كتكون تحت المراقبة، والشيء لاخر لي خايفين منو هاد الحكومات هو يوليو الناس يتعاملو بهاد البيتكوين فحوايج خرين بحال المتاجرة فالمخدرات والسلاح وتمويل العمليات الارهابية الى اخره وهادشي خلا بزاف ديال الدول يبداو يمنعوها بحال المغرب والسعودية ودول خرين..موهيم هادشي لي كاين درت هاد الموضوع بناء على الطلب...نتشاوفو فشي بلان خر.

المصادر :
http://lexicon.ft.com/Term?term=asset-bubble
https://bitcoin.org/en/faq#what-is-bitcoin
http://www.economist.com/…/21590901-it-looks-overvalued-eve…
https://www.washingtonpost.com/…/everything-you-need-to-k…/…

بقلــم: الـﺴـــــــﺎﻋــــﺮ
Gerard Lopez