المغاربة في ليلة رأس السنة ثمانية أنواع

 المغاربة في راس العام 8 أنواع :
- النوع الاول حازق مقودة عليه إذن راس لعام حرام و تشبه بالكفار و العيوذ بالله و هذا شي بدعة و لن ترضى عنك اليهود و النصارى و ...و...و... غادي يجبد لك ايات و احاديث و اقوال شيوخ ... وكفى الله المؤمنين شر القتال سدات مادام ...كيختما بالعبارة الشهيرة ( حتى يفطرو مع رمضان ... عاد نشطوا معاهم في راس لعالم ) ...
- النوع الثاني حازق و مقودة عليه لكن ما مفاكش باغي يعيش لحظة و يجبد لبريكة و يشعل لفلام و نجوم .... و يدوز راس لعام زاهي غالبا كتلقاه كيوجد قبل بشهر مع لعشران حيث بوحدو ما يقدش خاص كوتزاسيون في قرعة و طابلة و تسفيرة كراء طوموبيل و بارطما ...
- النوع الثالث حتى هو حازق و مقودة عليه الحطة ديال سوارية كاينة ...لكن مصروفها يجيب الله.... باقي مقاتل كيجمع باغي يطلع لمراكش هو ساطة يدوز ويك اند... و يكل لحلوة على جوج مرات ديال راس لعام... و ديال ما بين فخاد راس لعام..عموما هذا لبلان كيفشل ليه حيث مراكش عامرة لكراء غالي ساطة ما لقتاش كيفاش دير مع دار...
-النوع الرابع وصل سطاج الاخير ..ليلة راس لعام كيكون مجبد على سداري ديال حلفة مغطي بجوج مانطات معشي بالبيصارة و نص محراشة و مكونيكطي من سمارتفون ما بقاش كيشد شارج غالبا مبدل ...كيكتب لينا راه في اوطيل مامونية نايضة و لافي إي بيل ...حنا كنديرو معاه مزيان بجيم و تعاليق ديالنا ...ساط كيثيق راه في مامونية كينوض يزيد في تلفازة على حدها سهرة شعبي ....كيصدق نايض ليه باه مكبتها معاه ....هههههه
- النوع الخامس هدو ما مقوداش عليهم عندهم لعاقة ...كيدوز راس لعام في جو هادئ احتفال زوين ..وحديث عن اهم ما داز اهم تحديات لعام جاي ...كتوصل لحظة كنوضوا يحسبوا 10 9 8 .....كونط غبوغ...اهلا عام الجديد ...
نوع السادس عندو لعاقة لكن عقلو فقير جدا...كيمشي شي حفرة فيها عادل ميلودي و و سرحاني ...كيسكر كيجبد تليفون كيبغي يدير لايف من وسط لحفرة لي هو فيها كينوضو سكيرية بي معاهم دريات كيكبتها معاه ...كيصدق مساطح مع داك نوع ثاني لي دويت عليه لفوق 10 مشاركين في قرعة كيعطوه قتلة كلب ...كتخسر سوارية عند كلشي كيبداو تشيار بالقراعي و كتكبث ....نص صبيطار نص كوميسارية ...
نوع السابع ما مقودة عليه ما عندو لعاقة قانع بداكشي لي قسم ليه الله.....ما مسوق لحتى حاجة هو خارج النص.....ليلة راس لعام كيدير شي طوجين باللحم و ديسير رومان مع ريبي جميلة ...كيريح يطلق شي فيلم خاتر ..مرة مرة كيطل على الفايسبوك وعلى الانواع كلهم لي ذكرت اش كاتبين في بروفيل ديالهم كيبقى يضحك كيقول وحق رب لا بنادم تسطى ههههههه.... كينوض يدخل لطواليط مع 23:50 كيخرج مع 00:05...دخل خرا في 2017 و خرج لقى 2018...كيعرف لعام جاي كيف غادي يكون هههههه....متأكد مليار في مئة انه تا حاجة ما تبدل ...غير عام اخر مشى من حياتو في انتظار عام جديد تا هو يمشي ...copie coller...
نوع الثامن كتلقاه في اسرة شعبية عايشيين بيس اند لوف مناسبة لي جات كيحتفلوا بها اي مناسبة ديال مسلمين نصارى يهود ماجوس سطانيك مهم كينتزعوا لحظة فرح من بؤس الحياة ... ...الام دايرة ليلة راس لعام مرقة دجاج بالحامض و الزيتون و السفة ديال الروز بالقرفة و لوز مهرمش و الزبيب و طباسل صغار فيهم سكر كلاصي....و الاب جايب معاه حلوة creme ديال 80 درهم ...كلشي مجموع فرحان كيدعو الله يكون عام جديد عام لخير و لفرح و رزق ...كيخدمو شعبي كتنوض عائلة تنشط تشطح حتى كتوصل ساعة 00:00...انا من هذا صنف ثامن ....
بس : شباب ما تنسوش مبادرة ديال الاطفال لي خاصهم كتب و قصص و روايات محتاجينا نسعدوهم في ملئ مكتبة لي صيبوا ...تلقاو مبادرة في منشور لي قبل هذا ...لمهتم يدوز إنبوكس...
بكلافي : Benhrif tarik