فيكتور لوستيج أقوى نصاب على مر التاريخ الرجل الذي باع برج إيفل ......

ف سنة 1920 انتشر بين أغنياء "ولاية أوكلاهوما" وشي "ولايات أمريكية" أخرى "صندوق سحري" كيطبع على ورق أبيض فلوس من فئة 10 دولار طبق الأصل بلا أي تزوير وبأرقام مسلسلة كيقبلها أي بنك أمريكي ولا يشوبها أي تزييف ...
الصندوق كان كيصنعو ويبيعو السيد "فيكتور لوستيج" ب 30 ألف دولار لأي واحد باغي يشريه .. وهذا كان مبلغ كبير وكيشكل ثروة ديك الساعة ... ولكن إذا عرف السبب بطل العجب ... الصندوق كان عبارة على "آلة دفع ميكانيكي" لبضعة أوراق من فئة 10 دولار كاينة بصح وسط الصندوق المغلق بإحكام شديد جدا ... وفيه واحد المنفذ باش يدخل فيه الورق الأبيض لي ماعندو حتى فائدة ومنفذ آخر لي كتخرج منو الفلوس الحقيقية المتخزنة فيه ... الصندوق ماكانش كيهز كثر من 200 ورقة فئة 10 دولار يعني أقصى مجموع الورق كتطلع 2000 دولار فكان يربح البائع 28000 دولار من هاد النصباية ...
السيد "فيكتور لوستيج" والمشهور تاريخيا بأنه "أقوى نصاب على مر التاريخ" والملقب ب "الرجل الذي باع برج إيفل" .. كان شارط على أي واحد يشري من عندو الصندوق مايخدموش كثر من مرة فالنهار باش مايخسرش ... وطبعا گاع لي خداو الصندوق استعملوه كثر من مرة فالنهار وخسر ... يعني الفلوس الصحيحة لي فيه سالات ومابقى يخرج والو ...
شي وحدين من لي شراو الصندوق ومابقاش يخرج الفلوس كانوا يقلبو على النصاب باش يصايبو ليهم ... فكان النصاب تيحل الصندوق يدير فيه شوية الفلوس على ما يتحول من المدينة ويعطيه لمولاه وهكذا ...
لحد واحد المرة ... واحد "الكوميسير" ديال ميريكان مشهور بالرشوة والفساد شرى الصندوق بداك المبلغ الكبير ومنين خوا من الفلوس شدو هرسو وكتاشف النصباية لي طاح فيها ... مشى لعند النصاب فواحد "لوطيل" مخبي فيه باش يقتلو دق على باب الغرفة فتح ليه النصاب بكل هدوء وقاليه مرحبا "مون كوميسير" ... "الكوميسير" حط "الفردي" على راس النصاب وقاليه باغي تنصب عليا مالقيتي علامن تنصب ... رد عليه النصاب كيفاش واقيلا وقع شي خطأ فني ... رد عليه "الكوميسير" ماكاين لا خطأ لا والو الصندوق دايرو باش تنصب بيه ... المهم بقاو مني منك حتى قنع النصاب "الكوميسير" أنه يصايب ليه الصندوق وعمرو يخسر ... "الكوميسير" وافق بززز ...
النصاب فاق الصباح وكيقلب ف"الجورنالات" حتى لقى خبر لي كان كيتسناه ... "القبض على مأمور شرطة يروج أوراق نقدية مزورة من فئة العشرة دولار" ...
العبرة ... الا شي مرة كنتي ضحية نصاب ونصب عليك مزيان ... فالا شديتيه المرة الثانية وخلاك ثيق فيه تاني تستاهل كل ما سيفعله فيك وحلال عليه ما خدا منك .......... القديس الكانبو