نظام صرف ثابت و نظام صرف مرن

غادي نحاول نشرح ليكم بلان هاد ''تحرير سعر العملة" بشكل مبسط ... كاين ما يسمى ب"نظام الصرف" لي تيختالف بين "نظام صرف ثابت" و "نظام صرف مرن" و لي بزوج تيكونو لينا ما يسمى "الاقتصاد النقدي" ... ف"المغرب" تيعتامد على "النظام الثابت" لي تيتيح ليك أن العملة تبقى قيمتها ثابتة مقارنة مع العملات الاخرى و هادشي لي غادي يتغير كما تم التصريح به منذ مدة ليست قصيرة لكن تم الانطلاق الفعلي للعملية حدد يوم الاثنين و بالتالي تحول من "ثابت" الى "مرن" و يا مصيبتاه من هاد المرونة ...
فالعملية غتم بأن "بنك المغرب" واضع حد أقصى و حد أدنى لي غادي يبقى مقابلو غير يحس بالخطر يتدخل مباشرة و لي قال "الخلفي" أنه تحدد بتغير بين -2.5 و +2.5 و لي فالاصل كان ف"النظام الثابت" بين -0.3 و +0.3 (يعني تتبان ليك أنه العملية غتولي كارثة فالفشل ديالها لأن المتغيرات رتافعو بشكل كبير) ... هادشي لي شفناه مرعب ما هو الا بداية غيجربو بيها الوضع و تأقلم "الاقتصاد المغربي" (غادي نهضر عليه من بعد) فمن بعد ما يبان ليهم الامر غادي مزيان بدون مشاكل على "الاقتصاد المغربي" غادي يتحرر السعر بشكل كلي (ما قدها فيل زيدوها فيلة) و لي غادي يكون مرتبط ب"عملتي الدولار و اليورو" بحيث مرتبط بنسبة 60 فالمئة مع "اليورو" و 40 فالمئة مع "الدولار" فغتولي العملة تخضع ل"قانون العرض" و "الطلب" ف"سوق الصرف" ( بمعنى إذا كان الطلب و الناس بغات الدرهم المغربي غادي يطلع فالثمن و العكس صحيح) ...
تيقولو أنه هادشي غيديروه باش يحدو من خسارة قدرة الإقتصاد المغربي للتنافسية مع شركائها الأساسيين و هنا بغيت نطرح سؤال واش أصلا المغرب عندو "اقتصاد" و "تنافسي" من الفوق؟ الجواب "لا" كيف كنعرفو حتى و اذا تقزدرنا و قلنا انه "اقتصاد" فراه "ذو قطب واحد" و لي هو "سيكستو" اذن ماكين لا تنافسية لا ديدي لا حب ملوك بل تنشوف المغرب كفيرمة فيها مول الفلوس شاد كلشي تيعجبو بروجي يطلعو و يعمر بيه البشري و ينافس ماركة لي هو نيت مولها (لي بغى يفهم فين مشات المنافسة فالاقتصاد المغربي و تخلق هاد الاقتصاد ذو القطب الواحد يقرا "الملك المفترس") ... و تيقولو كذلك انهم باغين يتحكمو ف"التضخم" (ايوا هذا خبر زين اخاي الحسين) .. لا اخاي الزين ما مزيان كاع هاد القرار هو لي غادي يغرقك و يوصلك لمشكل ا"التضخم" لا محالة لأنه كنتيجة حتمية و متوقعة لا مفر منها نظرا ل"هشاشة الاقتصاد" و انه "دولة مستوردة" ما تتصدر والو من الاشياء لي تتصنعها بيدها هادشي اذا صنعات اصلا بل فقط تتصدر "المواد الخام" لي حتى عمليات التنقيب و الاستخراج ما تتقومش بيهم "شركات مغربية" ...
فانخفاض قيمة "الدرهم" مقابل "الدولار" و "اليورو" لا هروب و لا مفر عنه بسباب ضعف "تنافسية الاقتصاد" لي كيفما قلت سابقا ما يمكنش انا نافس راسي و لمحدودية "الناتج الداخلي الخام" فهادشي غيزيد الخل على الخلول فنهاية المطاف غيوصل لارتفاع الفوائد المفروضة على "الديون المغربية الخارجية" و غترتافع فاتورة الاستيراد و غيتقلص حجم "الاحتياطي المغربي" من "النقد الأجنبي" لي اصلا الى عقلتو الشهر الفايت "بنك المغرب" اشتكى من انه نخافض من احتياطي 7 أشهر ل 5 أشهر و نصف (واااااك واااااااك هادشي غير كنا ثابتي القيمة) ...
و لكل ما سبق سيداتي سادتي أبشركم أننا كمواطنين غادي ناكلو التمرميق و لله الحمد و المنة فانعكاسات هادشي غادي نشوفوه فحياتنا اليومية بالارتفاعات المهولة و أكرر "مهولة" للأسعار أما البطالة فحدث و لا حرج اما الفقراء أبشرهم بهلاك قريب غيتساراحو من الدنيا و يختافيو و غادي نبشر كذلك "الطبقة المتوسطة" بالسقوط ل"دوزييم ديفيزيون" و يبلاصيو "الفقراء" فالمرتبة ديالهم فيما العائلات "الميسورة" ستحل محل "المتوسطة" و تبقى "البرجوازية المتعفنة" في مكانها الطبيعي نظرا لان اموالها بالعملة الاجنبية بالاصل و جمدو اموالهم بتحويلها "للذهب" و يبقى على "رأس الهرم" صاحب "السدة العالية بالله" لي بين عملتو بالعملة و الاجنبية و نقل مقدار منها ل"افريقيا" فالخسائر لا تعنيه ...
هادشي سبقاتنا ليه "مصر" و لي وقع ليها "انهيار" ل"لجنيه المصري" ورتافعو الأسعار بشكل خيالي و وقعو ليها مشاكل ف"البورصة" و البطالة وولات كثر من الهم على القلب بل وختافاو بعض المواد الغذائية من السوق بصورة مخيفة بحالا عمرهم كانو و زييييييد يا أخي "يزيد" ... نعطي أمثلة بسيطة للعملية فالمغرب مثلا اذا واحد تيبيع "سمارت واتش" (ساعة ذكية) ستورد الحبة منهم ب 200 دولار (باعتبار الدولار الواحد يساوي 10الدراهم ف 2000 درهم) فهاداك البائع غادي يبيعها ليك ب 2500 درهم يعني رابح معاك 500 درهم ... حتال هنا مزيان لاننا اعتبرنا ان "قيمة العملة ثابتة" لكن مع التعويم غنديرو مثلا داك "الدولار ولا ب 15 درهم هنا غادي يولي داك التاجر يشري "الساعة" ب 2500 درهم من المصدر و يبيعها لينا ب 3000 درهم ... بتصور آخر "1 درهم" مع التعويم تقدر اليوم تبقى هي هي و غدا تساوي "50 سنتيم" (عشرة دريال) أو "20 سنتيم" (ربعة دريال) أو "150 سنتيم" (ثلاتين دريال) .. و بذلك اذا عندك 3 المليون فمرة تلق قيتما يالاه ساوية 2 المليون مرة 3 المليون و نصف مرة غير 8000 درهم ارتباطا بقيمة "الدرهم" ف"سوق العملة" ...
نهضرو شوية على المستفيدين على رأسهم "البنك الدولي" و لي هو "رأس الحربة" غيتمكن من "إعادة جدولة ديون المغرب" و غتستافد "الدول الغربية" من رخص بل نقولو الزهد فالاثمنة فيما يتعلق بالسياحة بل و حتى الاقامة الدائمة بالبلد لي غيكون مقموع فبلادو ويجي يعيشها امير هنا بالاحتفاظ بعملتو بلا ميحولها (يعني يعاملك باليورو و انت ضبر روحك سير صرفها) ... و فالمقابل "الجالية المغربية" غادي تاكل العصى فعملية "تحويل الاموال" فواخا الصرف ديالها غادي يتضاعف مثلا لكن قيمة دوك الوراق ما ساويا والو و هذا هو لي سبقلي قلت ليكم "تضخم" ... أما "أسعار المنتوجات المستوردة" بحال الحويج التيليفونات الادوية و اللائحة تطول غيوليو نار يا حبيبي نار وهذا راجع لكون اصحابها تيستوردو ب"العملة الصعبة" فهاذ الحالة لي كانو تيشريوه ب"درهم" ولا ب"درهمين" فالبيع غيقصاح و المشتري يهرب و بالتالي غادي يستافدو "الشركات المغربية" (ولي كيف سبقلي قلت كلهم ديال سيكستو) لانهم غادي يكثر الطلب على "المنتوجات المغربية" بكثرة ماشي على زينها و لكن لان ثمنها ارخص مقارنة بنظيرتها الاجنبية و لا تسأل عن "الجودة" لانك مجبر لا بطل ...
فواش غير جي و حرر العملة نعاماس راه لازمك اولا تكون عندك "دولة صناعية" و لي انت واخا تدير "روتريكة" لراسك مغتكونش حتى تشبه ليها و ثانيا خاص يكون عندك "اقتصاد تنافسي قوي" و انت عندك "مول الفيرمة" هاد العام "ليمون" و العام جاي "كرز" ...
واحد النقطة ف"الدول الديمقراطية" لازم "استفتاء" لبحال هاد الخطوة "المميتة" مثلا ليست ببعيدة لي قامت بيه "بريطانيا" و "استفتاءها للخروج من الاتحاد الاوروبي" لان التبعات غتوقع على "الشعب" بصورة أولى لذلك طلبو رأيهم ... كاين لي غينوض واااع "الجثماني" دارها لا لا "بنكي" لي دارها شحال قدك "تستحمر" روحك بروحك دستوريا و تعارفيا و تراتبيا هما كراكيز بيادق لا حول لهم ولا قوة "سيموكس" هو الآمر الناهي و لي بيدو آمرو بيها "البنك الدولي" و "صندوق النقد الدولي" لي شبع منهم "كريديات" و لي مابانوش على ارض الواقع لكن بانو فترتيب اغنى الحكام ...
أخيرا هادشي كامل للقضاء على شي حاجة سميتها "الطبقة الوسطى" لانها تاريخيا معروفة هي "الطبقة العنيدة" و لي قامت على مر العصور ب"الثورات" و التعنت ضد الحكم .. فالفقير حامد الله و ساكت و الغني معندوش الوقت لي يفكر لذلك بغاو يحيدو صحاب الروينة و يبقاو غير المرفحين و المكحطين المقردين ... من لخر لي يحسب نفسو فعذاب تنقوليه مازال ما شفتي والو "ا طوكوموري" ...
#متمرد_أنونيموس_ماساكتينش