فساحة الفلسفية : الفلسفة الإغريقية إلى الفلسفة المابعد حداثية .. مرورا بفلسفة الأنوار

فساحة الفلسفية كاينين بزاف دلمغالطات و الأخطاء و الثغرات و هادشي عادي، هادي هي طبيعة دلإنسان و الفلسفة، من الفلسفة الإغريقية إلى الفلسفة المابعد حداثية (دولوز، دريدا، فوكو...) مرورا بفلسفة الأنوار( روسو، كانط، ساد، فولتير) المغالطات أينما حلت و إرتحلت غادي تلقاها.
ليوما بغيت نسلط أضوائي الفكرية علا واحد المغالطة ليكاتقول أن ألبير كامو و فريدريك نيتشه عدميين و المشكل أن الأغلبية دناس متيقينها لأنهوم قتاصرو علا قراءة بعض شذرات ولا مقاطع ولا الصفحات الأولى من شي كتاب دالفلاسفة أعلاه.
أولا و قبل كل شيئ باش نحطكوم فسياق ديال هادشي ليكانقول خاصكوم تعرفو أشناهيا العدمية Nihilisme, العدمية هي واحد الفلسفة كاتقول أن العالم و الوجود الإنساني ماعندو حتا شي معنى ولا شي حقيقة ولا شي قيمة مطلقة، العدمية ضد كل تراتبية Hierarchie أو سلطة كيف كانت فيزيقية أولا ميتافيزيقية (Anarchisme) راك فاهم، و من أهم العدميين فالفلسفة، شوبنهاور و سيوران ليبزوج ناداو للإنتحار.
مهم دابا غانبدا فلقاصح، نبداو بلأستاذ لجليل ألبير كامو( كاين مقال كتبتو كايتناول سواري لكبار دلفلسفة دكامو ليبغاه مرحبا) ، كامو يا كامو، هاد سيد ليكانعتابرو أنا شخصيا قدوة ديالتي فلحياة عندو لعشرات دلكتوبة و المسرحيات و المقالات فعدة جرائد فرنسية، ليكايهمنا حنا هنا هوما كتوباتو، فأسطورة سيزيف Le mythe de sisyphe، ألبير كامو تايعاودلينا علا واحد ساط سميتو سيزيف، غدر لآلهة و حكمو عليه باش إيبقا إيهز واحد صخرة تالفوق دجبل وحتا كايقرب إيوصل وكاطيحليه، ماعلينا، كامو فهاد لكتاب تايقول خصنا نتقبلو هاد لوجود لعبثي كيفما هوا، Le destin n'est pas une punition، والعبث حسب كامو هو صراع بين الإنسان و اللامعنى دلحياة أو السكوت اللامعقول دلوجود، مهم منين سولو سي كامو علا ما يجب فعله أمام هاد 'السيرك' قاليهوم بعدو علا لإنتحار (حسب كامو لإنتاحر كايجي من كثرة الأسئلة الميتافيزيقية) و حاجا خرا عدم اللجوء فشي توجه فلسفي ولا ديني كيفما كان، و قاليهوم خاصكوم تمتازو بتلاتة دلحوايج، التمرد La révolte,الحرية La liberté و الحماس La Passion زيادة عن هذا ف الموت السعيد La mort heureuse سي كامو تايقولينا خاصنا نديرو لمستحيل باش نلقاو Le bonheur ومانعقدوش لوجود ديالنا وكان مورسو بطل فهاد رواية (ماشي مورسو دلغريب!).
ندوزو دابا لنيتشه ليكل واحد أشنو كايسميه، لهبيل، ميستيش، فورورو...هاد ساط تاهوا ماكانتش فلسافتو بريئة من الأسهم د العدمية، حيت أعلن موت الإلاه و لكره ديالو لرجال الدين (حيت بغا لإنسان إيعيش حر و مايستاغلوهش رجال دين، راكوم عارفين الإمبريالية دلقساوس و لكنيسة فداك لوقت) فهكذا تكلم زراداشت علا لسان زراداشت، و عبر علا لكراهية ديالتو للمرأة (حيت صاحبتو قاودات معاه سوايع) و سقراط فأفول الأصنام (حيت كان تايبانليه كداب) ...مهم نبداو بهكذا تكلم زرادشت، هاد لكتاب تناول فكرة محورية ليهيا الإنسان الأعلى بلعربية و Le Surhomme بلغة موليير و Superman بلغة ميخيات و أفكان أوفلا بلغة مالين لأرض. الإنسان الأعلى كايجي بعد الإنسان و بعد بعد الحيوان،بإختصار الإنسان الأعلى هو حسب نيتشه لمعنى دلأرض Le sens de la terre و هو إنسان يتفوق علا إنسانيته، ماعندوش علاقة بكل ماهو ميتافيزيقي و ديني، حرش و ماعندوش معا داكشي دالرحمة و الشفقة و جيش تيسكاتيون، كايتجنب إيهز Le chaos...نبقاو فهكذا تكلم زاراداشت،نيتشه فواحد لبراتية تايقوليك 'كيف حال الجمل أسدا و كيف إستحال الأسد طفلا' ولا شي حاجا هاكا، جوابا علا هذا نيتشه قالينا أن الإنسان كايتميتارفوزا La metamorphose، من الجمل للأسد للطفل، ف La phase دالجمل (رمز دالصبر و التحمل) تايكون غادي هاد لأخير فواحد صحرا و متقل، شويا كايولي سبع(رمز دلقوة و لجبروة) وتايبغي إيفرض ذاتو فصحراء و كايخرج ليه واحد التنين (رمز د القداسة و الخضوع) حامل فكل صدفة ديالو شي عقيدة قديمة مهم الأسد كايتغلب علا هاد تنين وكايولي طفل (رمز دلبداية). ف Consideration Inactuelle لميستيش عطا مثال دواحد البقرة ماكاتعرف لا ملل لا ألم، ماكاتقدرش تتذكر، منبعد هادشي، نيتشه قالينا أن النسيان مصدر دسعادة. فما وراء الخير و الشر فيلسوف المطرقة تايقول بأن الإنتحار غي Consolation، consoler بداريجة هوا داك لفعل ليكاديرو لأم لولدها باش إيلبد. زيادة علا هادشي كامل نيتشه ف جينيالوجيا الأخلاق Genealogie de la moral عتابر العدمية مرض كايكتاسح أوروبا و عطا مثال بشوبنهاور.
بريف ،كون كان كامو عدمي ماكانش غايرفض لإنتحار و ينادي للتمرد و الحرية و الحماس و الوضوحية و التأقلم معا هاد لوجود العبثي و تقبل دالقدر Le destion n'est pas une punition.
و كون كان فريدريك نيتشه عدمي ماكانش غايأسس مفهوم قدو قداش دلإنسان لأعلى وينظر للإنتحار بطريقة سلبية و يروكومونضي السعادة و إرادة القوة.
قبل أي تحليل أو تنظير فلسفي خاصنا نحطو لأمور فسياقها التاريخي، الإجتماعي، الإقتصادي...باش مانطيحوش فليوتوبيا، ساماوي ولوهم
بكلافيي : Haddi Ayoub