الحياة هي صراع من اجل البقاء بحال الحيوانات فالغابة لكن بطريقة اخرى

شوف..مشاكيلك وأحاسيسك وبلاناتك خليهم فراسك را عمر شي حد ماغيحس بيك من غير واليديك فقط، عندك شي مشكل ولا كتحس براسك باغي تفرگع ماتشكي على تاواحد دخل لشي بيت وبدى تهرس وتغوت ملي تسالي غسل وجهك وريح مع راسك وواجه الأمر بعقلانية، عمرك تربط مستقبالك ومشاكلك واحاسيسك بناس خرين حيت حتى واحد ماغدي يفهمك ولا يحس بيك، وعمرك تسنى شي حد يجي يهزك كلما طحتي هز راسك براسك حيت هاديك حياتك وحرب ديالك خصك تحارب فيها وتعول على راسك وماتعول على تاواحد وماتسنى تاواحد يجي يهزك ولا يمد ليك يدو حيت قدما ربطتي راسك بناس خرين قدما كاتقرب راسك من الخسارة، أحلامك وأهدافك ومستقبالك ماغديش يصنعوها صحابك دوك لي النص فيهم معاشرك على ود مصلاحتو والنص لاخر كينافقك، مستقبالك ماغديش تصنعو صاحبتك هاديك لي شحال سهرتي ليالي وسمحتي فنعاسك على ودها هادو كولهم غايجي واحد النهار السلام هو اللخر موحال يقولوه لك، داكشي علاش ماخصكش تربط أهدافك بناس خرين وماخصكش تسنى منهم تاحاجة، لذلك فورماطي راسك ودير بلانك قدام عينيك وشد طريقك باش تهز راسك براسك قبل مايوصل واحد النهار لي غاتلقى فيه راسك واقف منك للضس راس مالك كارط ناسيونال حيت كاع هادوك لي كنتي ديما معول عليهم غايغبر ليهم الأثر، غاتبغي تمشي عند صحابك غايشوفوك غيضورو عينيهم ويديرو بحالا مشافوكش حيت ديك ساعة هوما وصلو ومبقيتيش من المستوى ديالهم، ديك ساعة غايتحل باب واحد فوجهك، عرفتي شنو هو ؟ باب الكرفي والجفاف وحرث الشوك وكلما تفكرتي هاد البلان غايغرغرو عينيك بالدموع غاتخشي يدك فجيبك باش تجبد كلينيكس ماغديش تلقاه حيت حتى هو خوا بيك، داكشي علاش خصك من دابا دير ورقة وستيلو وحط فيها بلاناتك وشد طريقك وماتعول على تاواحد من غير راسك حيت فالحرب كل واحد كيتقاتل باش يضمن حياتو لراسو داكشي علاش عمرك تسنى شي واحد يجي يهزك..هز راسك براسك حيت هنا كل واحد كيضرب على راسو....فكر