لعجوز لي فصورة هي المثال الحي على أن الزمن دوار !!!

 العجوز لي فصورة هي المثال الحي على أن الزمن دوار !!!
اسمها "أوجيني دي مونيتو كوتيسه" و هي مواطنة اسبانية تزادت فغرناطة عام 1826 لعائلة ثرية هدشي علاش سيفطوها واليدها تقرا و تتكون ف فرنسا و بفضل جمالها و أناقتها بدات كتحضر لحفلات البلاط حتى شافها "نابليون بونبارت الثالث" و تزوجها و ولدات معاه ولدها الوحيد و وريث العرش و ولات رسميا إمبراطورة فرنسا.
فعام 1869 جات لمصر بدعوة من الخديوي اسماعيل باش تحضر حفل افتتاح "قناة السويس" لانه كان معجب بها لدرجة الافتتان و الهوس ملي كان عندها ففرنسا يتشكى لراجلها الامبراطور من الشركة لي كانت مسؤولة عن حفر القناة، هدشي علاش بنى لها قصر فجزيرة الزمالك و سماه "قصر الجزيرة" و شرط انه يكون نسخة عن قصر الحمراء باش تحس انها فمسقط راسها فغرناطة و بنى لها طريق باش تدوز عليها تشوف الأهرامات فلجيزة و هو ما يعرف الآن ب"شارع الهرم" و ملي بغات ترجع لدارها ففرنسا جاب لها "بونتي" عبارة عن سرير من الذهب...آه من الذهب...ماشي من الشكلاط 😉
مباشرة من بعد ما رجعات لفرنسا دخل راجلها فحرب مع الروس و تم عزله من السلطة و نفيه هو و اسرته لإنجلترا و مرض و مات و من بعد تبعو ولده و بقات الإمبراطورة عايشة بوحدها فبريطانيا سنوات و سنوات حتى قررت انها تمشي لمصر عل و عسى تخرج شوي من جو الكآبة علما انها ولات مواطنة عادية هدشي علاش نزلات فأوطيل متواضع على قد الحال فمنطقة "بور سعيد" و بدات كتزور أرامل الخديوي اسماعيل و تسترجع ذكرياتها معاه...رجعت فحالها لبريطانيا و ملي حسات براسها قربات تموت مشات لبلدها الأم و ماتت فمدريد وفعمرها 94 عام و هذي كانت آخر صورها: بلا جمال او مال أو ألقاب ملكية أو حتى ابن...
كأنها لم تكن.