الطريق نحو الإقلاع النهائي عن تذخين أو الإدمان أو أي عادة خبيثة ...

#إستراتيجية_واقعية_عملية_للتخلص_من_البلية :
فايت ليا هضرت على هاد الموضوع فمقالات سابقة، و لكن هاد المرة بغيت نركز على حاجة وحدة باش ما نشتتش انتباه القارئ الكريم، و نخليه يركز على واحد من أكبر العراقيل لي غا توجهو فالطريق نحو الإقلاع النهائي عن البلية.
من بعد مجموعة من المُحاولات الفاشلة للتخلص من البلية أو الإدمان أو أي عادة خبيثة ...
عرف أن واحد من أهم الأسباب لي كا يخلي حليمة ترجع لعادتها القديمة هو : #المُحيط، شنو كا نقصد بالمُحيط ؟
كا نقصد بيه لونتوراج و لي هو دوك ربعة تاع الحيوط لي دايرين بيك و دوك خمسة تاع الناس أقل أو أكثر لي كا تعمر معاهوم ...
قبل ما نزيد نتعمق معاك ...
العادات بصفة عامة عندهوم قُوة كبيرة عظيمة، أكبر منا، وي ، كبر منا، و باش تفهم هادشي مزيان غا نعاود نرشدك لكتاب غا يفيدك بزاف سميتو : قُوة العادات لتشارلز دوهيج.
راك غالط أ صديقي إذا كنتي كا توهم أنك تقدر تتحكم فالبلية و تقول للشيء كُن فيكُون و تقطعها ...
البلية خاصها #إستراتيجية ذكية فالتعامُل معاها حتى تولي تبعد عليها تلقائيا بدون أي ضغط
فهاد لارتيكل غا نبارتاجي معاك دُروس لي ستغرقت أكثر من خمس سنوات باش نستوعبهوم، تجارب فاشلة و دراسات مُعمقة و قراءة جذرية، و عُزلة طويلة ممزوجة بالتأمل الباطني و قراءة فالكتاب الداخلي.
ما فيها باس نفكرك بتجارب ديالك مُحتمل تكون عشتيها ...
سعيد كان مُدمن ديال التدخين ( يمكن ليك دير إسقاط حتى على الأفلام الإباحية)، و من بعد العديد من المُحاولات الفاشلة للإقلاع، ديما كا يلقا راسو شاد كارو بين يديه، و ما كا يفهمش علاش و كيفاش رجع.
هاكدا كريم ما ستسلمش، و ديما كان يدير مُحاولات حتى جاتو خدمة خارج المدينة ديالو، قال هادي هي الفُرصة باش نقطع، وفعلا قطع البلية طوال مُدة الهجرة ...
من بعد ما قضى عاماين فبلاد الغُربة و هو خدام، ما عمرو قرب فيها السيجارة ...
عاود رجع لبلادو، و تلاقا صحابو لي توحشوه، تفاجأو كيفاش قطع البلية لي ما عمرهوم تقوعو منو يقطعها.
هاكدا سعيد ولا كا يعمر معاهوم باش ما يقولوش عليه مكبر، سافر علينا و نسانا ...
من بعد أُسبوع من التعمار مع العشران القدام، سعيد كا يعصبو أحد الأصدقاء و كا ينوض مُباشرة يشعل كارو، من بعد ما راسو ولا ضارو، قال بينو و بين راسو، ما فيها باس غير هاد المرة و نرجع نكمل رحلة الإقلاع، لكن البلية أقوى منو، و هاكدا رجع يبدا رحلة الإدمان من جديد، لأنهُ عاود تذوق المُتعة و النشوة ديال الدوبامين لي كا يفرزها دماغو بتحفيز من مادة النيكوتين.
#ملاخظة :
- ملي كان سعيد فبلادو كان كا يفشل فالإقلاع على التدخين.
- ملي خوا بلادو لمُدة عامين نجح أنهُ يبعد تماما على البلية.
#تحليل :
ملي كان فبلادو كان كل مرة كا يفيق الصباح كا يعاود نفس الروتين و كا يشوف نفس المشاهد لي كا تخليه يمارس نفس العادة.
ملي خوا المدينة ديالو و بعد على صحابو صادف مشاهد جديدة لي خلاتو يطور عادات جديدة لي خلاتو يبعد على البلية بلا ما يحس.
#تفسير
- سعيد نجح للمرة الأولى فالإقلاع بسبب أنهُ خوا البلاد، و بعد على العباد لي كا يمارس معاهوم البلية، نجح بسبب أنهُ بعد على أي حاجة غا تفكرو فالعادة القديمة أو أنهُ يمارسها.
ملي سافر لمدينة جديدة حس براسو بحال إلى تولد ولادة جديدة، و هادشي علاش قالو سيادنا اللوالا : لي ما جال ما عرف بحق الرجال.
الدليل على صدق هاد الفرضية هو أنهُ ملي رجع لبلادو القديمة دار ما دارت حليمة.
#إستنتاج :
- تغيير المُحيط أو لونوتوراج أو البيئة حاجة ضرورية باش تغير أي بلية كا تعاني منها.
#لي_بغيت_وصل_ليك هو :
- ما يمكنش نتا كا تمشي لنفس البلايص و كا دير نفس الحوايج و باغي تولي إنسان آخر
باش تنجح فعملية التغيير ضروري خاصك تغير حتى المُحيط ديالك، باش تبدا صفحة جديدة و تطور عادات جديدة لي غا يعمرو ليك بلاصة العادات القديمة.
أما باش تبعد على البلية الخبيثة و تخلي بلاصتها الخوا، فعرف و وعا أن الكون يكرهُ الفراغ، و نعاود نفكرك أن قرعة تاع الما إذا خويتيها من الما فراه غادي تعمر بالهوا، و إذا خويتيها من الهوا فراه غادي تكمش فمُحاولة لسد الفراغ.
نتا باغي تبعد على الأفلام الإباحية، خاصك تبدل الغُرفة ديالك لي فكل لحظة كا تشوفها خوات كا تجيك النزوة و الشهوة ديال مُمارسة العادة.
خاصك أيضا تبدل حتى العشران لي فين ما عمرتي معاهوم كا يتعاودو على الإثارة الجنسية.
#البديل :
أحسن بديل يمكن ليك تفرغ فيه الطاقة ديالك و تعمر الثغرات لي خلاتهوم البلية هو :
#الرياضة
أكيد غا تسولني شكون هي أحسن رياضة يمكن ليا نمارسها باش نعمر بلاصة البلية ؟
الجواب : أحسن رياضة هي Sport
بمعنى أنك خاصك تدرب راسك ابتداءا من غدا تنوض تجري مع الصباح بكري ، و ملي كا نقول الصباح الباكر هنا كا نصيفط ليك ميساج باش تنعس بكري ما تفوتش الطناش، و هنا كا نصيفط ليك إسمس آخر : بعد على التيليفون ديالك قبل النعاس و عوضو بكتاب، حيتاش ملي تشد كتاب غا يجيك النعاس.
أو كما يقُولُ بنيامين فرانكلين :
Early to bed and early to rise makes a man healthy, wealthy and wise.
النعاس بكري، و الفياق بكري كا يرد الإنسان عندو صحة مزيانة، و ثروة كبيرة و حكمة عظيمة.
سو : نوض جري مع الصباح بكري باش تخلي الجسد ديالك يتخلص من الدُهون و من الطاقة الزائدة، و باش تبدا نهارك بالهارد وورك، باش داكشي لي من موراه يجي ساهل.
رجع دوش و فطر ليك مزيان بأكل صحي، و تفرغ للعمل أو الدراسة أو الهواية ديالك.
ثانيا : نخارط فلاصال لمُمارسة أي رياضة كا تعجبك، باش تلتازم بيها.
و فالختام نبغي نفكرك أنك إذا كنتي فعلا باغي تتغير فراه ضروري تغير دوك الحوايج الصغار لي كا يتراكمو و كا يوليو حوايج كبار :
- غير الموسيقى لي كا تمزك ليها لأنها تقدر تفكرك بالرجوع للبلية
- الناس لي كا تسمع ليهوم لأنهُم يقدرو يوسوسو ليك ترجع كيما كنتي
- الحيوط لي دايرين بيك لأنهُم يقدرو يحفزوك تتفرج فالرُسوم المُتحركة
- المقهى لي كا تعصر فيها لأنها تقدر تردك الإنسان القديم لي كنتيه.
غير أي حاجة صغيرة، و من بعد غا تفاجأ أنك بديتي كا تتغير فالحوايج الكبار.
و آخر حاجة نختم بيها هي وصية من #ويليام قائد أمريكي عظيم :
If you want to change the world, start off by making your bed
"Admiral William H McRaven"
إذا بغيتي تغير العالام، بدا بفْراشك.
©مُحمد بابور
#هكذا_تحدث_فاينبرت