ليس الوعي هو ما يحدد وجودك الاجتماعي.. إنما وجودك الاجتماعي هو الذي يحدد درجة وعيك.

الوعي ماشي هو تشد الباك وماشي هو دير لافاك وماشي هو تقرى لكارل ماركس ونيتشه وتقول انا واعي، الوعي هو تكون منطقي فتفكيرك، أي حاجة وأي موقف كتخدم فيه عقلك، فاش غاتكون واعي ماغديش تزرا من البوليسي وماغديش يغمقو عليك فالمقاطعات وماغديش تخلع من صحاب الگرافاطات وأهم شيء غيولي يبان لك محمد سادس كبشر عادي وماغديش تمجدو وماغتلحسش ليه يديه، فاش غاتكون واعي غاتكون عندك ثقة فراسك وغتولي عندك كاريزما باش دافع على راسك براسك وماغديش تزرا من بنادم بالعكس غاتفرض راسك وغايولي بنادم يضرب لك ألف حساب وأهم شيء غاتولي كرامتك وأهدافك فوق كل شيء مهما كان نوعها، فاش غاتكون واعي ماغديش تخدم العاطفة غتولي تخدم بلوجيك وحتى النظرة ديالك للأشياء غاتكون مختالفة على النظرة ديال لخرين، ايلا كان لاخر غينتاقم ولا غيضرب لحمو بزيزوار حيت صاحبتو خلاتو نت ماغديش ضرب لحمك حيت فنظرك ديك الدرية ماشي هي محور الكون، ايلا كانو لخرين كيشوفو الظلم وكيسكتو نت ماغديش تسكت نت غاتهضر حيت داك الوعي هو سلاحك، ملي غاتكون واعي ايلا سولاتك شي درية على بلاكة ديال طوبيس غاتنعتها ليها وغاتسكت، ماغديش تقوليها عطيني نمرتك ايلا توضرتي نرجعك لداركم، فاش غاتكون واعي ماغديش تخلص عصير ب30 درهم على صاحبتك وتخلي مك بلاش، فاش غاتكون واعي غاتعرف بلي الكبت كاين عند النساا وعند الرجال وماغديش تبقى عاطيها للتحلاب من بروفيل لبروفيل، فاش غاتكون واعي ماغديش تعنى بالحبس والبلية ولكن غادي تعنى بإيمانك وشخصيتك وقرايتك وشنو هاز فدماغك، فاش غاتكون واعي ماغديش توقف درية فطريق بزز باش تعطيك نمرتها وباش تبان واعر قدام صحابك، فاش غاتكون واعي ماغديش تخبط فبااب الطوبيس وتبدى تغني وتبرزط عباد الله فاش غاتكون واعي ماغديش تخسر الهضرة وتسب الرب قدام الناس باش تبان قبيح، فاش غاتكون واعي ملي غاتشوف مرا كبيرة واقفة فطوبيس غتعيط ليها وتعطيها بلاصتك، فاش غاتكون واعي غاتكون كاتفكر وملي غاتفكر راك غاتكون عايش....