أكبر دكتاتور وأكبر سفاح وأكبر طاغية داز فتاريخ البشرية

رجــــل قــــام بإبــــادة 79 مليــــون بشــــــﺮي.
"مـــاو تســـي تـــــــونــــــغ" ﺍﻟدكتــــــــاتـــــــور
فهاد الموضوع غانهضر على أكبر دكتاتور وأكبر سفاح وأكبر طاغية داز فتاريخ البشرية...نمشيو للموضوع..
"ماو تسي تونغ" زعيم الصين، "ماو" تزاد فالوقت لي كانت الثورة نايضة فالصين ضد سلالة "تشينغ" لي كانت حاكمة بالنظام الملكي، "ماو" غيتلاح لجامعة بكين، من بعدما سالا قرايتو غايولي استاذ جامعي وفنفس الوقت غادي يتأثر بالأفكار الماركسية وغاينضم للحزب الشيوعي ف1921، وف 1927 غايولي "ماو" من بين 12 عضو لي مأسسين الحزب الشيوعي وغيفرض راسو معاهم وهنا بالضبط غادي يجي واحد الحزب خر "حزب الكومنتاج" بقيادة "تشيانغ كاي" هاد السيد غادي يعلن الحرب على الشيوعيين لي معاهم "ماو تسي تونغ" هنا غيبدى "تشيانغ" يصفيها للشيوعيين بما فيهم العمال والمقاتلين، هاد المدبحة معروفة ب"تطهير الصين" هنا الشيوعيين مغيبقاش يبان ليهم أثر، فهاد الفترة "ماو تسي تونغ" من بعدما ماتو كاع الريوس الكبار لي كانو معاه فالحزب غادي يلقى رايو بوحدو وغادي يهرب هو وشي شيوعيين من الاتباع ديالو لجبال وغيتخباو تما لمدة عامين، فهاد الفترة "ماو" غادي يشكل قاعدة ديال حرب العصابات فجبال "شيبح كاغشان" وغيبداا يقتل ويعدم فبنادم وغياخد ليهم الاراضي ديالهم ومن بعدما فرض راسو وبردات القضية شوية "ماو" غادي يدير حكومة فجنوب غرب الاتحاد السوفياتي ف1930 ومن بعدما جرا على "تشيانغ" لجيهة "التايوان" ...ماو غادي يأسس جمهورية الصين الشعبية ف1949...
من بعدما وصل "ماو تسي تونغ" للسلطة وشرشم نظام الحكم لي كان بزعامة "تشيانغ كاي شيك" وجرا عليه ل"تايوان" هنا "ماو" لقى راسو حاكم حوالي مليار ديال البشر وباش يحكم هاد المليار ديال بنادم خصو يخدم العنف وغيبدى يقتل فالمعارضين ديالو بما فيهم الثوريين والامبرياليين والسياسيين، من بعد غتبقى ليه البلاد خصو يهزها من بعدما دمراتها الحروب والثورات، اول حاجة غيبدا بيها هي يحيد ديك الفكرة ديال تقديس الآباء لي كانت عند الصينيين وغيحولها لتقديس الوطن وغيحول النظام الاقتصادي من الرأسمالية للاشتراكية وغيسيطر على اجهزة الدولة وغيعطي شوية ديال الوقت للتعليم والصحة من بعد "ماو"غادي يركز على الصناعة الثقيلة وغيركز على الزراعة لي كانو كيمتاهنوها اغلب الصينيين ولكن "ماو" باغي يحقق ارباح بأكثر سرعة ممكنة هنا غادي يغامر وغايدير "مشروع القفزة الكبرى الى الامام" يعني غايركز على الصناعات الصغيرة وغايفرض على الفلاحين يخدمو بزربة ليل ونهار باش يقدر يحقق نتائج كبيرة، هنا الشعب ماغديش يستحمل هاد تمارة وغادي يفشل المشروع وغادي يتسبب هاد المشروع فالمجاعة والجوع وماتت فيه امة ديال البشر هنا "ماو" غايمشي يشري القمح من براا باش يوكل الشعب...
وباش يعوض "ماو" على الشعب غادي يوفر علاج مجاني للفلاحين وغايدير ليهم اطباء يتكلفو بيهم وهكا غادي تنقص الامراض والاوبئة، من بعد "ماو" غادي يطيح عليه واحد البلان لي هو "الثورة الثقافية الكبرى" الهدف من هاد الثورة هو يخدم التلاميذ والطلاب فالجيش الاحمر الشيوعي من بعد غادي يحرضهوم "ماو" بالمساعدة ديال مرتو "جيانغ كينغ" قائدة "عصابة الاربعة" وغادي يخرجو اكثر من مليون تلميذ وطالب عمرهم مابين 15 و 19 عام تحت شعار "العصيان حق" غادي يبداو يقلبو على اي واحد عندو أصول غربية ولا ميول غربية هنا غادي تنوض حروب أهلية وفوضى عارمة بينهم وبين المعارضة وغادي تسبب فمجزرة دموية غادي تمشي فيها 79 مليون ضحية بما فيها 35 مليون ضحية ماتت بسبب المجاعة و25 مليون ضحية ماتو فالحرب والمخيمات لي كان كيستغلهم باش يخدمو عندو..
فهاد الفترة غادين يقصدو المعابد البوذية والكنائس وغيبداو يحرقو التماثيل الدينية والكتب المقدسة وغيريبو اي حاجة عندها علاقة بعهد ماقبل الثورة، هاد الثورة الثقافية بقات مستمرة لمدة 7 سنين مات فيها مليون واحد قتلو فيها الاساتدة والمثقفين واي واحد شكو فيه وكانو كيسولو بنادم على شي كتوبة كتبهم "ماو تسي تونغ" ولي لقاوه معارفش هاد الكتوبة كيعدبوه تال الموت....من بعد "ماو تسي تونغ" غادي يدير واحد الحملة ضد العصافير والحشرات والناموس والفيران وغيبداو يصيدوهوم بدعوة انهم كياكلو الزرع والاراضي الزراعية وهاد الحملة غاتسبب ف فالمجاعة وغيموت فيها 20 مليون صيني من بعد يوقفو هاد الحملة نتيجة للخسائر لي تسببات فيها...ف 1970 "ماو" غيطلق اول قمر صناعي هنا الشعب غادي يفرح وغادي تدخل الدول الغربية وغتبارك المشروع للصين كإنجاز كبير ل"ماو تسي تونغ" من بعد سلسلة من المجازر الدموية...
السفاح"ماو تسي تونغ" فالفترة لي حكم فيها الصين دار شي حوايج مكيتقبلهاش للعقل منها: كان كيفرض على الشعب يعبدوه ويقدسوه وف 1969 غادي تعطيه "باكستان" واحد الكاضو لي هو "كروصة عامرة بالمانغو" هنا "ماو" غايفرق هاظ الكروصة على الشعب وغيصنغ بيها واحد البروباغندا زعما را "ماو" ولد الناس وكيدير الخير وحنا فرحانين بهاد الكاضو وعاش "ماو تسي تونغ"...من بعد واحد الطبيب ديال سنان غادي يجي عندو واحد الكليان هاز معاه حبة ديال "المانغو" وغيقوليه الطبيب هاد المانغو قريب لبطاطا هههههههههه هنا غادي يشدوه وغايعدموه تحت مايسمى بجريمة اتهام المانغو بأنه يشبه البطاطا هههههههه...وكان "ماو" خصو يمحي اي حاجة عندها علاقة بالبورجوازية بحال دوك تصاور لي كيلعبو بيهم دراري صغار (طوابع) وكان كيعتابرها جريمة واي واحد لقى عندو هاد التصاور او هاد الطوابع غادي يتعاقب...وكان كيحرض التلاميذ باش يقتلو الاساتذة بدعوة اي حاجة غيقريوها ليكم الاساتدة راها فاسدة..
فالسبعينات "ماو" باش يوفر شوية الفلوس لي كاتمشي فمواد البناء غادي يقوليهم ريبو "سور الصين" وهزو منو باش تبنيو وريبو واحد الطرف كامل باش يبنيو بيه د،...فنفس الفترة غادي يهجم واحد النمر على واحد القرية هنا "ماو" غادي يآمر باش يقتلو جميع الحيوانات المفترسة الشيء لي غيتسبب فموت 75 فالمؤة من النمور...عوتاني "ماو" غيطيح عليه واحد البلان هو يقلب اشارة المرور وغايقوليهم توقفو فالضو الخضر وتمشيو فالضو الحمر يعني العكس ديالنا حنا، هنا غادي يتدخل واحد رئيس الوزراء وغادي يقنع "ماو" بلي هادشي يتسبب فكارثة ونعل شيطان..من بعد ماو غادي يآمر يشدو أي واحد لابس كرافاطة ويغبروه فالحبس بدعوة انها جريمة حيت زعما الكرافاطة من مظاهر الرأسمالية ...
من بعد "ماو" غادي يجلس وزير الخارجية الامريكي "هنري كسنجر" وهضرو على الاقتصاد والعلاقات بين البلدين وهنا "هنري" غيبدا يقول ل"ماو" بلي الصين دولة فقيرة ومعندهاش التجارة وبلي النساء هوما سباب المشاكل هنا "ماو" غادي يجمع 10 المليون امرأة باش يعطيها كادو لميريكان هنا غادي يتدخل واحد السيد من نفس الحزب وغايقول ل"ماو" بلي هادشي غايخلي الشعب الصيني يحقد عليك وتقدر تنوض شي ثورة ضدك، صافي "ماو" غادي ينعل شيطان عوتاني ومن بعد مدة ف1976 غادي يموت السفاح "ماو تسي تونغ" على عمر 82 عام ومن المقولات ديالو فاش قرب يموت .."لست خائفا من أي شيء، لقد أرسل لي الرب دعوة.."....مات السفاح "ماو" وكيتصدر المقدمة بقتل 79 مليون صيني ومن بعدو كايجي "ستالين" بقتل حوالي 50 مليون ضحية وكيحتل "هتلر" الرتبة الثالثة بقتل حوالي 40 مليون ضحية....موهيم هادشي لي كاين نتمنى يكون الموضوع فالمستوى.
بقلـــــم: الــﺴـــــــــﺎﻋـــﺮ