بيــن العنصـــريـــــة ونظـــريــــة دارويـــــن..........

الـطفـــــــل القــــﺮد "أوتــــا بينغـــــا"
بيــن العنصـــريـــــة ونظـــريــــة دارويـــــن.

غاتشوف فالعبودية والعنصرية حتى تعيا غاتوصل هنا غاتقول حبس، الحدائق من صغرنا وحنا عارفينها خاصة بالحيوانات ولكن اش بان ليك فشي وحدين كيشدو بنادم ويدخلوه للحديقة مع القرودة باش يقولو لناس راه بنادم اصلو قرد ؟ مايمكنش ياك..نمشيو للموضوع..

تخيل معايا مشيتي لحديقة مع باك ولا عشرانك وبان ليك واحد السيد فالحديقة خاشينو مع القرودة باش غاتحس ؟ واينفوا غاتسول اش كيدير هذا هنا غايقولو لك هذا هو الدليل على نظرية التطور ديال "داروين" لي كتقول بلي الانسان اصلو قرد..(مع العلم النظرية مكتقولش بلي الانسان اصلو قرد..نرجعو لور..القزم الإفريقي"أوتا بينغا" تزاد ف جمهورية الكونغو وكينتامي لقبيلة "مابوتي" لي دار ليهم "ليوبولد الثاني" إبادة فاش استعمرات بلجيكا الكونغو،(لي ديجا دويت ليكم عليه) هاد القبيلة كانو مسالمين ودار ليهم "ليوبولد" إبادة حيت مارضاوش بالدل والاستعباد ديال البلجيكيين..هاد القبيلة كانو الناس ديالها قصار بزاف وكيشبهو للأقزام، موهيم من بعد إبادة قبيلة "مابوتي" غادي يبقى منهم واحد السيد مكتاب ليه يعيش سميتو "أوتا بينغا" لي نجى من القتل من بعدما قتلو ليه مرتو وولادو وعائيلتو وهرب لكن للأسف غادي يشدوه شي تجار الرقيق إفريقيين (تجارة العبيد)..

ف 1904 غادي يجي واحد السيد ميريكاني لإفريقيا هاد السيد سميتو "صامويل فيليبس فيرنر" (رجل اعمال) علاش جاا ؟ جاا باش يشري الأقزام الأفارقة باش يدير بيهم واحد المشروع مع واحد الدكتور ديال علم الأعراق سميتو "ويليام جون ميكغي"شناهوا هاد المشروع ؟ هاد جوج ديال الناس بغاو يشريو الأقزام البشريين باش يوريوهوم لناس ويبينو ليهم بلي نظرية "داروين" صحيحة زعما كدليل على صحة النظرية لي كاتقول ان الانسان اصلو قرد وهاد المشروع سميتو حديقة حيوان الإنسان باش يديرو فيها الاقزام الافارقة ويوريوهوم لناس..

نرجعو للفيلم..هاد رجل الأعمال الأمريكي غايتلاقى مع القزم"أوتا بينغا" وغايقوليه بلي ايلا مشيتي معايا غادي نعطيك(الملحة) زعما باغي يعاونو باش يمشي معاه، موهيم ف1904 غايرجع رجل الاعمال"صامويل"لميريكان ومعاه عرام ديال الأقزام ومن بعد غايشد "أوتا بينغا" وغايديه لولاية "ميسوري" بالضبط ل"سانت لويس" فين غايوريه لناس، موهيم من بعدما وصلو الناس غايبداو يتعجبو للشكل ديال القزم "أوتا بينغا" واكثر حاجة جاتهم عجب هي سنانو حيت السنان ديالو دايرين بحال المنشار، ماشي تزاد هكاك لا لا، "قبيلة مابوتي" كانت من الطقوس الدينية ديالهم هي يمضيو سنانهم على شكل منشار..

من بعد عامين غادي يحولو "أوتا بينغا" لحديقة الحيوانات "برونكس" فنيويورك وخشاوه مع القرودة تحت اسم "السلف القديم للإنسان" هنا غايجي مول الحديقة الدكتور "ويليام هرنوداي" وغايجمع الناس وغايبدى يغوح عليهم بلي اكتاشف انسان قرد كأكبر دليل على نظرية التطور ديال داروين هادشي خلا الناس يجيو يشوفوه من بعيد..

مع المدة الزوار بداو يتكبو على جهد باش يشوفو القزم "أوتا بينغا"فحديقة الحيوانات، وولا هو حديث الساعة لدرجة الناس كايجيو من جميع نواحي، هاد العنصرية غاتشعل العافية فقلوب الميريكانيين السود وغايتدخلو رجال الدين الأفارقة وغاينوضوها وعلى رأسهم القس "جيمس جوردون" لي غايخرج بواحد التصريح كايقول فيه "إننا الأفارقة، إن عرقنا قد عانى بما فيه الكفاية نحن جديرون أن تعاملونا كبشر"..

من بعد غاينوض يحتج على مول الحديقة "هرنوداي" باش يطلق سراح "اوتا بينغا" ولكن العنصري "هرنوداي" رفض الطلب ديالو الشيء لي حقد شي ناس وناضو دارو احتجاجات، من بعد غاينوض "هرنوداي" غايخرج "اوتا بينغا" من القفص وغايخليه فالحديقة يتصرف بحرية بحالو بحال ناس ولكن العنصريين الميريكانيين كانو كيضربوه ويتحاماو عليه هادشي خلا "أوتا بينغا" مايسكتش على حقو واي واحد قاسو كايهجم عليه ويسلخو..

من بعد كبرات القضية ودخلات فيها الصحافة كتحتج على هاد العنصرية، الشيء لي وصل هاد البلان للرأي العام وتدخلات السلطة وشدو العنصري "هرنوداي" وطلقو سراح "اوتا بينغا"ومشى لدار الايتام برعاية الكنيسة والقس "جينس جوردون"لي ضرباتو النفس على الأفارقة لدرجة انه تكلف بيه شخصيا..

وف 1910 غيعاود يتكلف بيه القس "جيمس جوردون" وغايسيفطو لولاية فيرجينيا ودخلو للمدرسة ودمجو مع المجتمع الامريكي وشرى ليه حوايج وصايب ليه سنانو باش ميضايقوهش العنصريين وميضحكوش عليه، "اوتا بينغا" تأقلم مع الحياة الجديدة بالزربة وقرى مزيان وشد اللغة ومن بعد خدم فواحد الشركة ديال التبغ وعاش بيخير ولكن مع ذلك منساش بلادو وبدى يفكر باش يرجع لماما أفريكا..

لكن للأسف ف1914 ناضت الحرب العالمية اللولة الشيء لي ماغديش يسمح ليه باش يرجع لإفريقيا مرة خرى من بعدما توقفات حركة الملاحة، وهاد البلان كان صدمة بالنسبة ليه وتعقد حيت شاف راسو خسر كولشي، من بعد عامين بالضبط ف1916 "أوتا بينغا" غايقرر يدير حد لحياتو الجحيمية غايجبد فردي وغايتيري فراسو وغايموت...ليسطوار ديال هاد السيد كانت اكبر دليل على استعباد الغرب للبشر لي كاتشوفوهوم دابا فاضحينا بالتاريخ والحقوق والتخلويض والنفاق الخاوي...هادشي لي كاين نتمنى يكون الموضوع فالمستوى وكالعادة نتشاوفو فشي موضوع خر.

بقلــم: الـﺴـــــــﺎﻋــــﺮ