تعريف : متلازمة ستوكهولم أو تعاطف مع العدو

هاد متلازمة ستوكهولم هي واحد الحالة نفسية كيتصاب بيها بنادم ملي كيتعاطف مع العدو ديالو ولا شي واحد خدا ليه حقو ولا ضربو وتعدى عليه، والشخص المصاب بهاد الحالة النفسية كيولي يتعاطف مع هذاك لي تعدى عليه مثلا المخطوف كيتعاعط مع لي خطفو (مثلو عليها واحد الفيلم هندي مؤخرا على واحد درية خطفوها باش يبيعوها لدار الدعارة ومن طول المدة لي كانت معاهم مبقاتش كتخاف منهم وتزعطات فزعيم ديالهم وولات كتبغيه ونسات راسها لدرجة فاش جاو لبوليس قتلو الزعيم لي خطفها بقات كتغوت عليهم وتبدلات حياتها رأسا على عقب) هاد ليسطوار بين قوسين باش تفهمو البلان...موهيم متلازمة ستوكهولم بانت ف 1973 وطلقو على هاد الحالة اسم "متلازمة ستوكهولم" نسبة لواح حادثة سرقة وقعات ف "ستوكهولم" ف السويد ملي هجمو شي شفارة على بنك "كريديتبانكين Kreditbanken" وشدو دوك الموظفين فالبنك كرهائن لمدة ستة أيام وطلبو فدية من البوليس، وفديك الفترة بداو الرهائن كيرتابطو عاطفياً مع الشفارة لدرجة دافعو عليهم بعدما طلقوهم وشدوهم البوليس، وهاد الحالة كيتصاب بيها بنادم من خلال الخطر والمجازفة التي كيتحملها الضحية.
وكنمودج خر باش نزيد نفسر ليكم كاينة واحد السيدة سميتها"باتي هيرست" بنت واحد السيد ملعق من كاليفورنيا، خطفوها شي مسلحين ثوريين ف 1974، ولكن الغريب بلاصة ماتقاومهم تعاطفات معاهم وشاركات معاهم ف واحد عملية سرقه قبل مايشدوها البوليس ويضربوها بالحبس. ولكن محامي الدفاع ديال باتي هيرست قال بلي خضعات لعملية غسيل دماغ، وبلي كانت كتعاني من متلازمة ستوكهولم الشيء لي خلاها تعاطف معاهم وتشارك معاهم فعملية سرقة وهاد القضية وقعات مع الرئيس الفلسطيني فاش بكى فالجنازة ديال الرئيس الاسرائيلي السابق لي مات...هذا آخر موضوع لهاد الليلة نتمنى تكونو استافدتو الى اللقاء في موضوع آخر✌
المصادر :
https://counsellingresource.com/therapy/self-help/stockholm
https://www.psychologytoday.com/…/what-underlies-stockholm-…
http://changingminds.org/explanati…/…/stockholm_syndrome.htm
بقلم: الساعر