الابادة الارمينية (الجزء الاول) .....

الابادة الارمينية (الجزء الاول) .....
الابادة الارمينية (الجزء الاول) ...... génocide arménien
اول حاجة قبل مندخل الموضوع و حينت طويل.. انقسمو على 2 اجزاء .الاول نعرفكم على دولة ارمينيا وشكون هي باش نحطكم في الصورة و الجزء الثاني نهدر فيه على الابادة الوحشية اللي تعرضو ليها..
ارمينيا .. هاد الدولة الصغيرة النائمة بين احضان سلسلة جبال الارارات شرق اروبا..كنت محظوظة جدا انني تعرفت على هد البلاد عن قرب.. في 5 شهورة قضيتها في هاد الدولة الرائعة بمناخها و طبيعتها و ناسها..
..مساحتها 29.743 كلم مربع عاصمتها "يرفيان" وعملتها "الدرام" عدد سكانها كتقدر ب 6 مليون نسمة ..كشكل الجنس الارمني نسبة 97% وكلهم مسيحيين والباقي من اقليات روس و ايرانيين واكرانيين واكراد.. هي دولة عندها جدور في التاريخ.. ولكن تاريخها الحديث بدا قبل 25 سنة ..مني خدات استقلالها من الاتحاد السوفياتي.. وكانت دولة وحدة باسم "القوقاز" مع جورجيا و اذربيدجان قبل ماينقاسمو عام 1991 ..عندها حدود مع جورجيا في الشمال اذريبدجان في الشرق.. تركيا من الغرب.. وايران من الجنوب.هي دولة داخلية مفيهاش البحر وعندها مناخ قاري.. يعني البرد قارس في الشتا و الموت الصهد ف الصيف.. فيها اكبر بحيرة على المرتفعات في العالم.. "بحيرة سيفان" ومنها كيشرب الارمن .. وفي جنب هاد البحيرة كين اقدم كنيسة في العالم "الكنيسة الرسولية" و 2 كنائس ومعبد ديني كرجع لفترة "المملكة الارمينية".هادا من المعالم التاريخية في البلاد..فارمينيا كين اطول خط "telefric" في العالم وكيربط بين جبال الارارات و هو مرشح باش ادخل لموسوعة "guiniss book" .. سياسيا كينين 2 قضايا تاريخية ..الاولى هي "الابادة الارمينية" واللي غنتكلم عليها في الجزء الماجي..والثانية قضية اقليم "ناجورنو كارباخ" واللي انفاصل من اذريبدجان وخداتو ارمينيا..ومزال النزاع لحد الان في الحدود..اما دينيا امكن نقول انها اول دولة خدات هاد الديانة بصفة رسمية منذ 301 ميلادية ووقفات ضد الهجومات الاسلامية وحتى من مغول و سلاجقة و عثمانيين.. وناسها متعلقين بهاد الدين بواحد الشكل كبير جنوني لدرجة ان كل ارميني ديانته مسيحية..في كل انحاء العالم.اللغة الرسمية هي الارمينية وهادشي منذ القرن 5 ميلادي وكتكون من 38 حرف..اللغة الثانية هي الروسية..بداو المؤرخين من القدم كترجمو الكتب و المؤلفات للارمنية وهاد البلاد نسبة الامية فيها تقدر ب0% وفوق هدشي هم شعب كاتب قارئ و متقف من الدرجة الاولى.. وحتى المهاجرين الارمن في الدول الاخرى غالبا كنلقاوهم فنانين كتاب وزراء محامون دائما في القمة..باختصار هي دولة نقية منظمة ناسها ملتزمين و مبرمجين بالوقت. ومنظمين. مسالمين عايشين السلم الروحي والذاتي..في جولة صغيرة فيها اتحسو برواحكم في دولة عربية شرقية ولكنها خدات النظام و الثقافة و الاناقة الروسية...
نرجعوا دابا للتاريخ القديم نتاعها .اي قبل تاسيس الدولة الارمينية الاولى وكانت عبارة على مجموعة من القبائل قبل مايقوم واحد الزعيم اسمه."ارمنياك" واللي منبعد غادي اكون زعيم دولة ارمينيا الكبرى.ومنه تخدا اسمه واتعمل اسم للدولة...ولكن في عام 1843 غادي اتغير كلشي مني غادي تعرض لهجوم من الدولة العثمانية..و روسيا القيصرية واللي غادين اقسموها الى ارمينيا تركية و ارمينيا روسية.وفي عام 1877 اتقوم مظاهرات في "ارمينيا التركية" بسبب سياسة التحقير و التجويع لعملاته الدولة العثمانية والسبب انه كان الجزء الوحيد في الامبراطورية اللي مسيحي.هادشي خلا روسيا القيصرية تهاجم هاد الجزء وتحتل مساحة مهمة .. قبل ميتعقد معاهدة "سان ايستفانو" "1878" وهنا فرضات روسيا على العثمانيين حسن معاملة الارمن و المساواة في التعامل.. ولكن من بعد ما استقلات دول البلقان و القوقاز من الامبراطورية .. اتراجع "السلطان عبد الحميد " عن بنود الاتفاقية وايرجع للمعاملة الخايبة و العنصرية ضد الارمن وهادشي بسبب ديانتهم و خوفا من انهم اطالبوا باستقلالهم وهادشي غادي اضعف هاد الدولة في اروبا .. ومن هنا غادي تبدا اول العلامات نتاع اكبر ابادة جماعية عرفها العالم في القرن ال20 واللي تقسمات ل 3 مراحل.. وهادشي اللي غادي نعرفوه في الجزء الجاي
‫#‏شارلي_بالدرجة