حـــركــــة 20 فبــرايــــر Mouvement Du 20 Fevrier

"نـــريــد مغـــربــــا جــديـــــدا"
فواحد البلاد لي كثر فيها الفساد..ولا يعلو فيها إلا صوت الطغاة..بينما صوت الشعب لا يسمع..كان خصنا نهزو ريوسنا كلنا باش نوصلو صوتنا ماشي ليهم..إنما للعالم..بلي وصل واحد العهد لي غيكون فيه صوت الشعب أعلى من صوت أي طاغي وأي سلطوي وأي فاسد فهاد البلاد..حنا لي غانوليو نهضرو وهوما يتسنطو..حنا لي غانوليو نخططو وهوما لي غاينفدو...حنا لي غانوليو نعاقبوهم ايلا غلطو..حنا لي غانوليو نحاسبوهم..حيت حنا بزااف وهوما قلال..حيت حنا الوعي والحرية والكرامة والصرامة وهوما السلطة والفساد والنهب والزرواطة...
"حركة 20 فبراير" تحت شعار "نريد مغربا جديدا" هي واحد الموفمون جات من أجل المطالبة بالإصلاحات فهاد البلاد الفاسدة، جات من أجل التغيير بالضبط ف20 فبراير فعام 2011 مباشرة من بعدما طاح نظام "زين العابدين" فتونس بسباب الثورة الشعبية التونسية ومن بعد الثورة المصرية ف2011...هنا ناضو بعض المغاربة الأحرار قالو علاش حتى حنا مانوضوش ونديرو ثورة شعبية تكون شاملة فكامل البلاد من أجل الوقوف فوجه الفساد والمطالبة بمغرب جديد...
كانت هادي هي الفكرة فاللول..شوية بداو الناس كيستاجبو للحراك الشعبي وبداو المظاهرات والاحتجاجات كينتاشرو فجميع مناطق البلاد وشاركو فيها مئات الآلاف ديال البشر شباب ونساء ورجال لي عندهم رغبة فالتغيير..شوية بشوية بداو ينضمو ليها شي أحزاب وشي جماعات بحال العدل والإحسان حيت هاد الحركة كانت هي اللولة من نوعها فالمغرب وكانت حركة وازنة وانطالقات ب3 ديال المجموعات المتحررة...المجموعة اللولة سميتها "حرية وديمقراطية الآن" والثانية سميتها "الشعب يريد التغيير" والمجموعة الثالثة " من اجل الكرامة الإنتفاضة هي الحل" وهنا غاتبدا الإنتفاضة ديال الحركة فالمغرب...
الحركة ببساطة ماشي انفصالية كيف كيقولو شي وحدين...الحركة جات من أجل التغيير والحرية والكرامة والعيش الكريم..حيت فديك الفترة كان الشعب واصلة فيه لعظم ومبقات عندو قيمة وارتافعات الاسعار والمعيشة غلات والناس كتموت بجوع والصحة زيرو والطب زيرو والتعليم زيرو والوظيفة زيرو والسكن زيرو ومبقى عندك الحق فوالو لا فالاستفادة لا والو لا فالصحة والتطبيب لا والو لدرجة ولات العيشة فالمغرب أشبه بالعيش فالجحيم...
هادشي كامل بسباب الفساد وبسباب الريوس الكبار لي كينهبو وكياكلو فالشعب والسلطة القمعية لي فيما هزيتي راسك يهرسوه لك فيما دويتي يسكتوك ويقمعوك بجميع الأساليب وحتى المظاهرات والاحتجاجات والمطالبة بالحقوق مكايناش حيت بحالا كتلعب بالعافية وحتى الصحافة لي غادة تكالي الدق على المتظاهرين قمعوها...يعني نت فواحد الحبس مغديش تخرج منو وحتى واحد مكيسمع ليك وحتى واحد مغيسمع ليك ولكن عندك جوج اختيارات..تموت دقة دقة ولا تموت فدقة...اختار...كانت هادي هي العيشة فالمغرب وباقة هكا ايلا يومنا هذا...
فظل هاد الامور كلها وهاد الحگرة كاملة كان خص الشعب يتفركع وينتافض فوجه الطغاة والفاسدين هنا غتبان "حركة 20 فبراير" وغايخرجو الناس بمئات الآلاف فجميع مناطق البلاد...علاش ؟ من أجل المطالبة بدستور ديمقراطي جديد يستاجب للشعب وماشي يتطبق على الشعب..وإقالة الحكومة والبرلمان ونطلعو حكومة جديدة لي غاتخضع لإرادة الشعب ماشي ارادة الطفاة والفاسدين والشفارة..زائد المطالبة بقضاء يكون نزيه ويكون مستقل وميكونش كيخدم مصالح الطغاة والسلطويين الفاسدين..
زائد المطالبة بمحاكمة الفاسدين ودوك لي كيستغلو السلطة والنفود باش ينهبو ويسرقو ثروات البلاد ويخليو للشعب الضس...زائد الإعتراف باللغة الامازيغية كلغة رسمية فالمغرب الى جانب العربية ونهتمو بتاريخ وخصوصيات اللغة الامازيغية..زائد تحقيق العيش الكريم للشعب وتوفير وظيفة للعاطلين والمشومرين زائد تخفيض اسعار المعيشة والزيادة فالأجور للمواطنين زائد اعطاء الحق للمواطنين باش يستافدو من الخدمات الاجتماعية والصحة والتطبيب وغيرها وتحقيق العدالة الاجتماعية للشعب وأخيرا اطلاق سراح المعتقلين الأحرار والفصل بين الثروة والسلطة فالمناصب الحكومية وإقامة ملكية برلمانية واجراء انتخابات نزيهة ووضع دستور جديد يكون شامل للحريات وفصل السلط وتحقيق العدل والمساواة بين الجنسين والافراد....
كانت هادي هي المطالب ديال الحركة...طبعا هادشي ماغديش يعجب المخزن الفاسد والسلطة الشيء لي غايخليهم يبداو يقمعو الحركة بكاع الأساليب بالزراوط والاعتقالات والتفرشيخ...ولكن رغم ذلك واصلو المتظاهرين النضال تال آخر نفس بأسلوب سلمي...هنا كان ضروري خص محمد السادس يتدخل ويجاوب الحركة وإلا عمرهوم ماغيسكتو خاصة انه ناضت الروبلة فالمغرب فحوالي 54 منطقة ومدينة...
هنا غايتدخل محمد السادس بالضبط نهار 9 فمارس من نفس العام 2011 وغادي يجاوب الحراك الشعبي وغادي يعلن على تحقيق مطالب الحركة وتم إنشاء دستور جديد واستاجب لمطالب الحركة من الاصلاحات الاجتماعية ومن بعد جات الإنتخابات فوقت من غير وقتها المعتاد وتم تشكيل حكومة جديدة استجابة ايضا للحراك الشعبي وطلعو الإسلاميين للحكومة...
من بعدما استاجب الملك لمطالب الحركة ومن بعدما تشكلات الحكومة فالدستور الجديد هنا الحركة غتبدى تبرد الطرح وغيبدا الحراك الشعبي يتراجع حيت صافي الحركة حققات الهدف لي بغات توصل ليه ضونك مكاينش لاش نبقاو نتغاوتو...تما بدات كتضارب الأقاويل بلي عاصفة حركة 20 فبراير غير سحابة ودايزة وبلي غايجي واحد النهار وغادة تفرتك ومغتبقاش عندها ديك القوة وديك الهيبة لي زعزعات المخزن والنظام...
وفعلا هادشي لي وقع من بعد بالضبط فاللخر ديال عام 2011...حيت من داك نهار الحركة تراجعات وخسرات بزاف ديال المتظاهرين والأعضاء...كاين لي ضبرو عليهم وسكتوهوم وكاين لي دخل مع احزاب خرى لي كانت ضد حركة 20 فبراير..وكاين لي باع الماتش وضبر على بلاصة فشي تيار خر...بالاضافة للإنسحاب ديال جماعة العدل والاحسان والاحزاب لخرى لي ركبو على ظهر الحركة حتى دارو كراسا فالانتخابات وشي وحدين خافو لا يوقع فالمغرب كيف وقع فتونس ومصر... كل واحد وفين زاد ولم يتبق منها إلا بعض الأوفياء والإعلام لي غايبقى كل عام يخلد الذكرى ديالها حيت لأول مرة فالتاريخ المغاربة قدرو يتخلصو من الخوف ومبقاوش كيخافو من السلطة والمخزن ووقفو فوجه النظام واستاجب للمطالب ديالهم...هادشي كامل بسباب حركة 20 فبراير...
ربما النظام ماستاجبش لمطالب الحركة كاملة واستاجب غير لشي حاجة بحال اقرار دستور جديد وحكومة جديدة وانتخابات نزيهة وبعض الاصلاحات الاجتماعية ولكن على الاقل وصلات واحد الميصاج للنظام بلي وقت الغميق سالا شحال هادي وحققات لينا واحد الوعي شبابي ديمقراطي عمرو ماكان وبسبابها لأول مرة غايدخل الشعب فمفاوضات مع النظام وتصنتو ليه وحققو ليه مطاليبو واخا ماوفاوش بيها كاملة...وايلا كان النظام ماوفاش بالمطالب كاملة الى يومنا هذا فهذا راجع للخونة لي باعو الماتش ومشاو دخلو للإنتخابات وشراو كراسا فالبرلمان حيت كاتهمهم غير مصالحهم وماشي مصالح الشعب واستغلو الحركة وركبو على ظهر بنادم وطالقينها للكذوب والنفاق والشعب وووو حتى ضبرو على ريوسهم ونساو الهدف اللول والاسمى لي جات بيه الحركة النهار اللول..
ربما اليوم حركة 20 فبراير لم يتبقى لنا منها سوى الذكرى فهذا راجع لعدم الوفاء ديال الخونة واصحاب المصالح لي كانو لابسين التوني ديال النضال على قبل مصالحهم وماشي مصالح الشعب لي كانت تحت شعار "الشعب يريد مغربا جديدا" وهادشي لي خارج علينا فهاد البلاد عندنا فائض فالخونة، بسبابهم تباعت البلاد هادي سنين...ذكرى 20 فبراير مجيدة وتحية للأحرار فينما كانو...هادشي لي كاين نتشاوفو مرة خرى...بيس..
بقلــم: الـﺴـــــــﺎﻋــــﺮ