كيفـــــاش نقطــــــع الگـــــــارو ؟
"الإقــــلاع عــــن التــــــدخيـــــن"
الگارو والبلية ولاو شي حاجة أساسية فحياة المدمنين، لدرجة المدمن يقدر يتخلا على بزاف ديال الحوايج لي هوما مهمين ليه بزاف على قبل البلية وكيبقى حياتو كاملة هكاا حيت ولا عبد عند ديك البلية ويلا ماتخلصش منها غتبقى حتى غاتقتلو...نمشيو للموضوع.
كيف قلت الگارو ولا حاجة أساسية عند شي ناس سوا عند الرجال سوا النسااء، والكذبة الشائعة هي فاش كنشوف شي حد معصب كيقولك أرا ليا نشعل شي گارو باش نتكالمى..نت مكتكالماش نت كتزيد مرض على مرض ومن الجهل أنك عارفو غادي يقتلك واحد النهار ومع ذلك مامسوقش وعادي عندك حيت تبليتي وفقدتي السيطرة على راسك تقدر تصبر فبزاف ديال الحوايج وتقاتل ولكن ملي كتوصل للگارو والبلية كاتفشل ماكتقدرش تقاوم وتقدر تحاول مراات كثيرة باش تحيدو وغتعاود ترجع تكيف...
الگارو هو الترويج عن النفس وخلق السعادة بالنسبة لكاع الناس لي كيتكيفو بسبب مادة "النيكوتين" ولكن إيلا جبت واحد السيد عمرو ماكما فحياتو وعطيناه گارو ماغيحس بوالو مغتبان ليه لا سعادة لا تالعبة حيت اصلا مكايناش شي حاجة سميتها السعادة فالتدخين هاديك مجرد أوهام خلقها الإدمان عند الشخص لي كيتكيف ومع المدة الجسم ديالو استوعب هاد الكذبة وتيقها وولا خاضع ليها بحال خضوع العبد للسيد...واش عارف الأضرار ديال هاد الگارو ؟
التدخين بصفة عامة كيستهدف الجسم كامل بداية من الأنسجة وكينقص من الأكسجين فالجسم وملي كيتنقص الأكسجين كيتنقص حتى عدد الخلايا لي كتغدى من الدم والأكسجين...حيت هاد الويل لي كاتكميه فيه 4 آلاف مادة سامة وعلى رأسها "أول أكسيد الكربون" و"النيكوتين" ومن أصل هاد 4 آلاف مادة كاينة فيها 37 مادة كاتسبب فالسرطان..ومن غير هادشي الگارو كايضعف العظام وكيتسبب ليها فالهشاشة وهكا تقدر غير طيح شي طيحة عادية وتهرس فيها حيت العظام عندك رشااو وهادشي بسباب "النيكوتين" لي كيولي عندك فالدم وفنفس الوقت كايزير الأوعية الدموية...ومن غير هادشي الگارو والبلية بصفة عامة كتقتل الجهاز التنفسي وكتسبب فالسرطان لجميع الاعضاء لي مرتابطة بجهاز التنفس بما في ذلك سرطان الفم والرئة وسرطان الحنجرة...
فاش كتكون كاتكيف كايولي عندك التهاب فالشعب الهوائية ديالك وهكا كاتولي تنفس غير بزز وبمجرد انك تكون فشي بلاصة لي قليل فيها الأكسجين تيق بيا غايصليو عليك...ومن غير هادشي التدخين كيقتل شرايين القلب وهادشي كيأثر على القلب وكايخليك تكون معرض للسكتة الدماغية فأي لحظة...زائد أمراض الجلد كيتسبب التدخين فظهور التجاعيد وموت خلايا الجلد وكيتسبب فأمراض اللثة وكيضعف الأسنان حتى كيطيحو داكشي علاش فيما ضرتي تلقى بنادم فمو طايح...وكإضافة التدخين كيأثر على الجهاز الهضمي وكيتسبب فسرطان القولون بسباب المواد السرطانية لي فيه وهادشي كيقتل الشهية عند بنادم وكيأثر حتى على الكبد وكيتسبب ليه فالتهابات (الكبد الوبائي)...
ايلا كنتي فشكل بمجرد ماغتعرف الامراض لي كيتسبب فيها هاد الويل غادي دير النفس وتقطعو...كيف قلت بزاف ديال الناس كيبغيو يقطعوه غير كادوز يومين ولا سيمانة وكيرجع تاني يبدى يتكيف...ببساطة حيت النيكوتين ولا عندك فالدم وولا الجسم ديالك عايش بيه وميقدرش يستغنى عليه يعني اينفوا تقطعو الجسم ديالك غيبدى يحس بشي حاجة ناقصة وبالثالي غادي تستسلم وغاتمشي تكمي وتلبي الطلب للجسم ديالك ولكن ايلا كنتي فعلا باغي تقطعو وعندك ارادة تيق بيا غادي تحيدو...كيفاش ندير نقطعو ؟
نكونو واقعيين تاحاجة ماصعيبة وكلما كانت الارادة ديالك قوية كلما كتزاد عندك حظوظ النجاح يعني ريح مع راسك وسول راسك واش بغيتي بصح تقطعو ومتبقاش ترجع ليه ؟ آه بغيت نقطعو يعني غادي تاخد قرار لا رجعة فيه من بعد حدد واحد التاريخ لي غتبدى فيه مثلا من غدا ومتبقاش تأجل لا ليوم تال غدا تال بعدو تال شهر جاي لا لا، من غدا وتوكل عالله...البروغرام لي غادي تمشي عليه هو انك ايلا كنتي فعلا باغي تغير راسك وتقطع الكارو والبلية خصك تبعد من اي حاجة غاتفكرك فالتدخين بحال القهوة والبلايص لي كاتكيف فيهم وحتى دراري لي كنتي كتكيف معاهم وهاد البلايص غادي تعوضهم ببلايص خرين خرج سير جري سير للبحر سير تقيد فلاصال سير لعب كورة وحتى داكشي لي كنتي كتشربو بدلو مثلا كنتي كتكيف بقهيوة متبقاش تشربها باش تنسى الكارو بمرة هادشي في حالة باغي تقطع التدخين من الضربة اللولة...
وفي حالة بغيتي تقطعو تدريجيا يعني دقة دقة البروغرام لي غاتمشي عليه هو انك غادي تنقص من الگارو يعني مثلا ايلا كنتي كاتكمي 7 الگوارو فنهار غدا غادي تكمي غير 6 ولا 5 وبعدو كمي 4 وكل نهار نقص واحد ولا 2 ومن الأحسن تبدل الگارو لي كاتكميه ودير بلاصتو واحد خفيف لي فيه نسبة قليلة من النيكوتين وهكا غاتبدى تنقص تدريجيا....انا ماعطيتكومش هاد الاضرار من راسي لا لا هادشي صرحو بيه كبار الأطباء فالعالم وماعطيتكومش هاد الاضرار باش نخلعكوم ولا باش نتشفى فيكم لا لا، اعطيتكم هاد الأمراض حيت هذا هو البلان لي غايخليك دير النفس وتجمع راسك ملي غاتعرف راسك اشنو كاتكيف...كيف قلت باش تنسى الگارو خصك تحيد اي حاجة غاتفكرك فيه وتقنع راسك ان هادشي لي كادير كايقلل من نسب الإصابة ديالك بأمراض خطيرة وحاول تعمر نهارك بالسبور ودير واحد 30 دقيقة ديال المشي فكل نهار وشرب الماا بزاف ويلا كان شي عصير حتى هو مزيان وحاول تمارس بعض تمارين الاسترخاء بحال اليوغا ومرة مرة حرك ليها شي ماصاج باش تحيد الضغط النفسي والتوتر ويلا كاع حسيتي براسك ضعيف شوف شي طبيب يعطيك بعض النصائح وشي أدوية لي غاتعاونك...ويلا كان عندك شي عشير كايتكيف دير معاه شي بروغرام وقطعوه بجوج باش تشجعو بعضياتكم ويلا مبغاش قوليه مايكميش حداك.
الأمر ماشي ساهل صراحة ولكن ايلا كانت عندك ارادة غادي تقطعو وراه بزاف ديال الناس دارو النفس وقطعوه ودابا راهم عايشين بيخير، حيت هادي مسألة حياة وموت...يا تقتلو يا غيقتلك ونت ختار لي بغيتي والله يعفو على الجميع...لي عندو شي صاحبو مبلي يطاگيه باش يعرف راسو شنو كيدير....هادشي لي كاين نتشاوفو فشي بلان خر...بيس.
بقلــم: الـﺴـــــــﺎﻋــــﺮ
Gerard Lopez
#شارلي_بالدارجة
0 تعليقات
أكتب لتعليق