الأب الــــروحــــي لـــــلأدب.... دوستــــويفسكــــــي.... متابعة القراءة

أسطـــورة لـن يكــررهــا التــــاريخ .

"فيـــــودور دوستــــويفسكــــــي"
الأب الــــروحــــي لـــــلأدب.

من رحم المعاناة يولد العظماء..ربما مجرد جملة بالنسبة ليك، ولكن فاش كاتعمق فتاريخ وأفكار العظماء غادي تراجع على رأيك..غاتدرك العمق الحقيقي ديالها ان المعاناة عمرها ماكانت حاجز..بل كانت دافع لواحد الشرارة ديال التحدي والنضال والصمود والثورة فسبيل واحد الحاجة جوهرية....نمشيو للموضوع.

العملاق والأب الروحي للأدب الروسي والأسطورة "دوستويفسكي"...الإسم ديالو "فيودور ميخائيلوفيتش دوستويفسكي" تزاد فعام 1821 فمستشفى الفقراء ف"موسكو" .."روسيا" فواحد الفترة ديال الصراعات والأزمات السياسية...تزاد وسط عائلة بسيطة الحال..كان باه طبيب فالجيش الروسي ولكن الدخل ديالو كان ضعيف الشيء لي غايخليه يخلي الخدمة العسكرية ويخدم فمستشفى الفقراء ف"موسكو"..وهو المستشفى لي تزاد فيه الاسطورة "دوستويفسكي"..

"دوستويفسكي" تفرض عليه يتزاد فوسط واحد العائلة معقدة..مو كانت متدينة بزاف وباه كان سلطوي بزاف نظرا للتجربة ديالو كضابط فالعسكر..الأب ديال "دوستويفسكي" كان معقد وحاقد من جيهة الفقر لي كيعاني منو وهاد الغضب كان كايفرغو فراسو وفعائيلتو الشيء لي كايخلي "دوستويفسكي" يعيش فواحد الحبس عائلي..لا خروج لا دروج لا نزهات لا اصدقاء لا اقارب لا والو..."دوستويفسكي"حل عينو فواحد الوسط عائلي معقد بزااف وهادشي طبعا غادي يأثر عليه وغادي يخليه يعيش معزول على البشر..."دوستويفسكي" رغم الحاجز والعزلة لي كانت مبعداه على الناس كان ديما كيحس بيهم وكيهتم ليهم ويفكر ليهم كان كيحس بالفقراء والمرضى والمقهورين والمحرومين...كانت هادي هي الشرارة ديال الثورة ديال "دوستويفسكي" ثورة ضد الفقر والقهر والحرمان..كان ديما كيتساؤل اشنو دارو هاد الفقراء باش يتعاقبو هكا ؟ اشنو دنب هاد المرضى والمقهورين والمحرومين ؟ علاش هوما هكا ؟ شنو لي خلاهوم يكونو هكا ؟

"دوستويفسكي" ربما مكانش عندو اصدقاء ولكن كان مصاحب مع الكتوبة..قرى الكتوبة ديال "أفلاطون" و"تشارلز ديكنز" و"فيكتور هيغو" و"كانط" و"طوماس مان" و"شيكسبير" وغيرهوم..قرى الفلسفة وعلم النفس غيرها من العلوم..باش يتكون مزيان...ملي وصل لسن 16 عام غادة تأزم الاوضاع فحياتو مباشرة من بعدما ماتت مو ومن وراها غادي يطلع هو وخوه لمدرسة المهندسين ف"سان بطرسبورغ" وغايقرى تما..وتما "دوستويفسكي" غادي يشوف عالم آخر..مجتمع عامر غرباء..مجتمع مادي لا وجود فيه للكرامة وقيمة الانسان..الشيء لي غادي يخليه ينعازل على البشر وعلى كولشي وحتى الاساتذة..كيعرف حاجة وحدة فحياتو هي الكتوبة والعزلة فقط ولا غير...ومن بعد مدة غادي يتخرج من هاد المدرسة وغادي يخدم كمهندس...

من بعد غادي يوقع واحد البلان آخر غادي يأزم عليه الوضع وهو الوفاة ديال باه..قتلو واحد الفلاح كان خدام عندو حيت باه كان طاغية وكان حگار.."دوستويفسكي" ماتقلقش ومبقاش فيه الحال حيت باه مات وهنا جات القولة ديالو فواحد الكتاب ديالو كيقول فيه "ومن منا لا يتمنى موت أبيه ؟"..كان حاقد على باه..حيت كان بخيل ومات وخلا ليه الديون وهنا "دوستويفسكي" غادي يدفع الثمن ديال التسقريم ديال باه وخصو يخلص الديون لي خلا باه..وهنا غيبدى يطلب الناس يسلفوه باش يخلص الديون تاع باه وحتى المؤلفات لي كان كيكتبها مكانش كيتخلص عليها مزيان حيت هادوك لي كان كيكتب ليهم كانو كيستغلوه ويستغلو دوك الديون لي كيتسالو لباه ويديرو بيهم السبة وبالتالي مكيعطيوهش شي صالير نيت..كانو كيبهدلوه..الشيء لي كايخليه يبيع حوايجو ويبيع الفراش باش يأمن المعيشة ولكن الكتابة عمرو ما تخلا عليها..رغم هاد الظروف المزرية..

"دوستويفسكي" كان كيعاني بزااف من البؤس والعذاب لذلك فكر يحرر راسو من هاد العذاب ولكن مايحررش غير راسو وانما فكر يحرر معاه كاع الفقراء والمعذبين فروسيا وفالعالم كامل..كان كيعتابر الفقراء وجميع المقهورين كإخوة ليه..هنا غايمشي غيلتاحق بالحركة الثورية "التراشيفسكي" هاد الحركة كانت مثقفة وكانت ضد النظام القيصري فروسيا وغايبدى يثور ضد النظام الاستبدادي.."دوستويفسكي" كانت عندو شخصية قوية خاصة فالخطابات الثورية ديالو داخل الحركة...الفرق بينو وبين "لينين" و"تروتسكي" و"ستالين" لي غادين يجيو بعدو هو ان "دوستويفسكي" مكانش كيقلب على الشهرة والسلطة ومبغاش يتعرف...

هنا النظام القيصري طبعا ماغديش يسكت وغادين يشدوه وتاهموه بالخيانة والتآمر ضد نظام حكم القيصر وهنا حكمو عليه بالإعدام رميا بالرصاص هو وأتباعو..هنا غايشدوه وغايربطوه بالسناسل وغايجروه لساحة الاعدام (ساحة سيميونوفسكي") تما كيتسناوه الجنود لي غادين يشرشموه بالقرطاس..هنا ملي وصلوه لساحة الاعدام غادين يوقفوه هو ودوك لي معاه على شكل صف باش يتيريو فيهم لكن الغريب هو ان كاع هادوك غمضو عينيهم وكيبكيو خوفا من الموت في حين "دوستويفسكي" بقى حال عينيه وماخافش كان مآمن انه ماغديش يموت وفعلا هادشي لي غايوقع فالدقيقة اللخرة غادي يجي واحد الضابط كايجري سيفطو القيصر وقاليهم بلي القيصر عفى على "دوستويفسكي" هو وصحابو وبلاصة ما يعدمهم بدل ليهم الحكم بالنفي ل"سيبيريا" لمدة 4 سنين زائد الاعمال الشاقة...والجميل هو ان هاد المنغى لي تنفى ليه "دوستويفسكي" غادي يتنفى ليه "القيصر" وعائيلتو من طرف الثوار فعام 1917...

من بعدما تنفى "دوستويفسكي" ل"سيبيريا" تما غادي يشوف عالم آخر غيلقى تما غير القتلة والمجرمين واللصوص والبولونيين لي هوما اكثر الناس حقدا على الروس...هنا "دوستويفسكي" لقى راسو فغابة من الوحوش إذا لا مجال للثقة هنا ولا مجال للصداقة..هنا غيبدى يخدم فالاعمال الشاقة وغايبدى يهز ويحط الحجر بحال العبد وفنفس الوقت كان كيعاني من نوبات الصرع وبقى وفي للكتابة واخا فالمنفى كان كيكتب..لمدة 4 سنين ديال التكرفيص والقهر..أخيرا جاء الفرج..طلقو سراحو ورجع لحريتو...ولكن واش هو نفس "دوستويفسكي" لي عرفناه شحال هادي ولا تبدل ؟..

طبعا لا، رجع نكرة حتى واحد مكيعرفو حتى واحد ماعقل عليه حتى واحد ماسول فيه..حتى واحد مابغى يتعامل معاه..حتى واحد ماتسوق ليه وحتى واحد مبغى يعاونو...هنا "دوستويفسكي" غادي يتطوع للجيش ومن بعد مدة غادي يسيفطوه تاني ل"سيبيريا" ولكن هاد المرة كضابط ملازم...جمع شوية ديال الفلوس وفنفس الوقت خسر اعز حاجة عندو..خسر الكتابة..مبقاش مسموح ليه ينشر شي كتاب..ولكن طبعا شخص بقيمة "دوستويفسكي" ماغديش يفقد الأمل وانما غادي يكتب ولكن بأسماء مستعارة باش مايخونش راسو...من بعد غادي يخرج من الخدمة العسكرية وغيستاقل منها من بعدما جمع شوية ديال الفلوس..هنا غايرجع ل"سان بطرسبورغ" رغم انه فقد الأمل فبلادو..هنا غايألف كتاب "منزل الاموات" لي غادي يتشهر بيه فرمشة عين وهنا غيحس بالحياة بدات كاضحك ليه..وهنا غيتشارك مع خوه وغادي يأسسو واحد المجلة أدبية وغايعطيها غير للكتابة لكن للأسف عوتاني غيوقفو فطريقو غيمنعو المجلة ديالو..ومن وراها غادي تموت مرتو وغادي يموت خوه وغادي تموت بنتو وولدو زائد الاحتقار ديال الدولة ليه ..

هنا تاني رجعات الهموم والمصائب وبدات المعاناة والديون عوتاني لكن مع ذلك ما استسلمش بقى مقاتل بقى كيكتب ليل ونهار لكن للأسف دوك لي كيكتب ليهم طغاو عليه..هنا غادي يتحنسر وغيبان ليه الحل الوحيد هو الهرب لأوروبا وفعلا هادشي لي دار هرب مع واحد ختنا ولكن حتى هي تخلات عليه وقلبات عليه وجهها فأوروبا...هنا "دوستويفسكي" غايحس بالغربة..لقى راسو فواحد البلاد ماعندو فيها حتى شبر مكيعرف تاواحد..كيموت على بلادو ولكن الظروف خلاتو يخوي البلاد ويهرب ولكن حبو لروسيا خلاه يكتب عليها واخا هو فالغربة بقى كيكتب على فقراء روسيا وعلى الاوضاع والصراعات والسياسات الاحتقارية تما...

هنا غايكتب بزاف ديال الكتب من بينهم "الجريمة والعقاب" و"المغامر" و"الأبالسة" و"الأبله" و"مذكرات كاتب" وغيرها لي زعزع بيها قلوب الناس والقراء لدرجة فعام 1881 خرجو الناس للشارع كايبكيو على وداع الاسطورة "دوستوفسكي" من بعدما مات بسباب نزيف فالرئة وخرجو ملايين البشر فالجنازة ديالو وخرجو الروسيين هازين السناسل لي كان رابط بيها النظام الاسطورة "دوستويفسكي" ...داك الانسان الفقير لي ماشاف من بلادو غير العذاب والقهر والمعاناة والظلم والفقر..ديك البلاد لي ناضل من أجلها بأرقى الأساليب..أسلوب الثورة الأدبية..أسلوب الكتابة ومخاطبة القلوب.."دوستويفسكي" رسول روسيا والأب الروحي للأدب...ومن المقولات الخالدة ديالو ["تمنح القوة فقط لمن يجرؤ على الانحناء لإلتقاطها، لا يهم سوى شيء واحد، شيء واحد فقط، هو القدرة على المواجهة"].."فيودور ميخائيلوفيتش دوستويفسكي"...

معلومات اضافية:
الكتب ديالو تترجمات ل170 لغة
الدار ديالو حولوها لمتحف باسم "متحف دوستويفسكي"
خدم كصحفي ومحرر فالكثير من المجلات

بقلــم: الـﺴـــــــﺎﻋــــﺮ