الــديمقـــراطيــــة :الــوجـــه الآخـــر لــلإستبـــداد

الــوجـــه الآخـــر لــلإستبـــداد.
فيما ضرتي غاتلقى كولشي كيهضر على الديمقراطية..بل ايلا قلتي شي حاجة ماشي هي هاديك يقولو لك انت ماشي ديمقراطي..كولشي كيشوف ان الديمقراطية هي الحل للخلاص من تبعيات الدمار والفساد..ولكن واش هاد الديمقراطية مطبقة فالواقع ؟ ولا هي مجرد وهم من اوهام السياسات الدكتانورية الاستبدادية ؟...نمشيو للموضوع.
كيف قلت كولشي اليوم كيهضر على الديمقراطية بلي هي الحل والوسيلة الوحيدة باش نحلو مشاكلنا ونتقدمو شوية..كنسمعو الناس كايهضرو على الحرية والعدل والمساواة والانسانية وغيرها من المصطلحات الديمقراطية..ولكن واش هاد الحرية والمساواة والعدل والانسانية مطبقين فأرض الواقع ؟ هاد الديمقراطية لي جات من عند الغرب وفاضحينا بيها واش كتشوفها فأرض الواقع ؟...انا نجاوبك.
ايلا مشيتي ل "إسبانيا" غاتلقى ان الديمقراطية حكم ونظام زائف كايوهم الناس بشعارات الحرية والمساواة وحقوق الاقليات وغيرها..علاش ؟ حيت ايلا شفتي الدستور ديال اسبانيا غاتلقاه كيقول أن "اسبانيا" دولة كاثوليكية وحق الإنتخاب كيعطيه الدستور غير للمواطنين الاسبانيين لي هوما كاثوليكيين..ايوا ودوك لي ماشي كاثوليكيين ؟ فيناهي الديمقراطية هنا ؟ فيناهيا حقوق الاقليات وحقوق الانسان والمساواة ؟...
ايلا مشيتي لطاليان غاتلقى نفس الشيء لا صوت يعلو على صوت الكاثوليكيين..حيت الكاثوليكية سابقة الديمقراطية ولو يوقفو ملايين الايطاليين ويصوتو لشي حزب كيعارض الكاثوليكية ضد هاد القرار مايصورو تا وزة حيت مكيناش شي سلطة فوق وصاية الكنيسة الكاثوليكية..فيناهي الديمقراطية ؟ فيناهي المساواة ؟...ماشي ديما اي حاجة قريتيها فالكتوبة راك غاتشوفها فالواقع...مستحيل غير ايلا بغيتي تكدب على راسك...الديمقراطية فالعمق ديالها كلها مصالح...
نفس الديمقراطية الزائفة كنشوفوها عند ميريكان وراكوم شفتو الفضيحة ديال "جورج بوش" وخوه "جيب بوش" كيف تلاعبو بالانتخابات وخباو الاصوات لي صوتات ضدهم لي العدد ديالها 57 ألف و700 صوت ودارو السبة من بعد بلي هادوك لي منعو الاصوات ديالهم راهم كلهم مجرمين...هادي هي الديمقراطية لي كيوهمونا بيها ولي هي فالأصل مجرد استبداد لابس قناع الخلاص...اليوم الغرب عاقو بالقالب ديال الحكومات وعاقو بلي الديمقراطية هي مجرد وهم واستعباد غير مباشر وهاهوما اليوم كيحاربوها لدرجة اكبر الجرائد والصحف مامعتارفينش بيها في حين المجتمعات الاسلامية كتمجدها وكتشوف فيها الرحمة....
بزاف ديال الفلاسفة انتاقدو هاد الديمقراطية واعتابروها كنظام فاسد وعلى رأسهم "أرسطو" لي هضر على اشكال الحكم فالكتاب ديالو "السياسة" وذكر الديمقراطية كشكل من اشكال الحكم المنحرفة والفاسدة وكيعتابر الديمقراطية كنظام حكم طغياني كايتقسم على مجموعة من الافراد ونفس الفكرة شير ليها "أفلاطون" فكتاب "الجمهورية"...
الديمقراطية سيف من سيوف أمريكا والغرب بحكم اننا دول تبعية مكنجيبوش شي نظام من عندنا وانما كانقلدو ونتصنتو..الديمقراطية لي فاضحة بيها ميريكان الوقت راكم شفتوها فدمار الفيتنام وكوبا وباناما ودول الشام وافغانستان وباكستان وغيرها زائد المنظمات الحقوقية الامريكية لي تأسسو ف"تونس" و"مصر" وغيرها من الدول الافريقية واش كيحساب ليك هاد المنظمات جاو غير هكاك حبا في الله ؟ لا اسيدي راه ميريكان قالت اي دولة رفضات السياسة ديال ميريكان غادة تسحب منها كولشي ديالها وجميع المنظمات ديالها...
حيت هاد المنظمات هي باش غاتوصلك الديمقراطية...نقدر نعطيك واحد المثال بسيط...واحد الدولة فيها جميع النساء محجبات وداخلين سوق ريوسهم..واحد نهار جبنا واحد 5 ديال العيالات مبوكصين طالقين شعرهوم ومتبرجات وبداو كيعمرو لهاد المتحجبات راسهم نتوما خصكم تحررو لاش كتبقاو مستعبدات وخصكم تستمتعو بالجمال وداكشي ديالكم فإطار الحقوق وداكشي وينفخو ليهم ريوسهم مزيان...اشنو غاتكون النتيجة فنظرك ؟ هذا مجرد مثال لتقريب الفكرة باش تفهم الدور لي كايلعبوه الجمعيات والمنظمات...شوفو تونس دابا كيف ولات هاهوما بقاو عليهوم بالمساواة حتى خرجو ليها نيشان وتساواو فالورث ولات المرا كاتورث بحال الراجل..ايوا وديك الشريعة الاسلامية وحظ الانثيين وداكشي كامل مشى ؟...انا ماشي ضد المساواة انا فقط كنحاول نبين الفكرة لي بغيت نوصل ليكم...
ميريكان كتنادي الشعوب باش يتظاهرو باش ياخدو حقوقهم وفنفس الوقت كتنادي الحكومات وكتقوليهوم ماضربوش المتظاهرين وكونو سلميين معاهم وديك بلا بلا، ايوا ملي ناض الشعب الامريكي كيحتج على مركز البورصة ف"والت ستريت" خرجات ليهم بالزرواطة وفبلاصة ماتوقف الحكومة فجنب المتظاهرين وتاخد ليهم حقهم ناضت كاتسلخ فيهوم لدرجة ماتو فيهم بزاف ديال المتظاهرين داك نهار...ايوا فيناهي ديك الديمقراطية والسلمية وداك النفاق الخاوي ؟..إسبانيا حتى هي شحال وهي كتنادي الشعوب بالتحرر والديمقراطية وديك بلا بلا ونهار ناضو الكاطالونيين كيطالبو باستقلال كاطالونيا على اسبانيا خرجات ليهم بالزرواطة مارحمات لا كبير لا صغير...فيناهي ديك الحرية وديك الديمقراطية لي شحال وهي فاضحة الوقت بيها ؟...
مانمشيوش بعيد؛ المغرب خير مثال على الديمقراطية...عقلتو على الاساتذة المتدربين لي خرجات ليهم الدولة بالزرواطة..ياك كاين حق التظاهر..وانا على ماعقلت دوك المتدربين ماهزو لا حجر لا فرادى لا جناوا..حراك جرادة اليوم ماشفت فيه لا حجر لا جناوا مع ذلك السلطات المخزنية القمعية كاتفرشخ فيهم وكتحيد ليهم التيليفونات باش مايصوروش الفضيحة ديالهم والفساد المخزني..هل يعقل انك تشوف الديمقراطية فواحد النظام دكتاتوري بلباس ديمقراطي ؟ ببساطة وبدون لغة الخشب الديمقراطية هي مجرد أداة سطر عليها مزيات مجرد أداة للوصول لغاية معينة..الديمقراطية مجرد وسيلة...
الديمقراطية هي حكم الشعب لنفسه..واش حنا حاكمين ريوسنا ؟ طبعا لا حنا أصلا معايشينش وصوتنا مقموع فيما هزيتي راسك يهرسوه لك فأبسط الاشياء..وفيناهي هاد الديمقراطية ؟ المشكل ديالنا حنا الشعوب اننا باغين ناكلو ونشربو ونعسو في سلم وأمن ماكنهتموش بالسياسة وماكنتسوقوش للصفقات لي كايعقدوها والكونطرات لي كيسينيوها الريوس الكبار حنا الهم الوحيد ديالنا هو ناكلو ونشربو ونعسو...وماسوقناش فالسياسة..
الديمقراطية عمرها ماتكون فشي بلاد لي فيها النظام مكيحملش لي يعارضو أبداا..حيت باش تكون ديمقراطي خصك تقبل لي يعارضك..هنا الشعب كيتنازل على كولشي على قبل العيش..كيقتل أفكارو قبل ماتزاد...وهكا كاتكون عندنا الديمقراطية فالوراق ولكن فالواقع عندنا الديكتاتورية...وباش نغيرو الواقع بكل بساطة خصنا التفكير والوعي حيت كايمشي نظام وكايجي نظام وكيمشي رئيس وكايجي رئيس ولكن الشعب كيبقى تابث مكيتغيرش ونهار يكون المجتمع والرأي العام عندو قيمة ومكانة مستقلة وصوت مسموع مكيتزراش من النظام ونهار يكون الحاكم سوي ديك الساعة غاتكون عندنا الديمقراطية وباش نختم الموضوع "إن الله لا يغير ما بقوم حتى يغيرو ما بأنفسهم"....هادشي لي كاين نتشاوفو مرة خرى..بيس.
بقلــم: الـﺴـــــــﺎﻋــــﺮ