ما أحوجنا الى متل هاته الافكار ...........

الإبداع ما عندوش حدود، وممكن فكرة بسيطة تحولها لمشروع زوين وتقدر تعيش بيه وفنفس الوقت تستامتع بالعمل لي اختاريتي ودوز فيه وقت زوين..
الليلة كنت كانتسركل ف شوارع اگادير، بالضبط ف حي السلام. صادفت واحد الولد زوين كايدفع كروسة صغيرة وطالق مزيكا زوينة. كايبيع الگلية. اثار انتباهي بداك الديكور لي دار للكروسة والذوق الجميل ف اختيار الأغاني.
مشيت عندو ناخد الگلية ونشوف شنو مكتوب ف الملصقات لي موراها.. لقيت أنها رسائل وكلمات لطيفة من زبائن عابرون، كايشريو الگلية وكايعطيهم وراق صغار لاصقة وستيلو وحتى لوحة باش يكتبو.. كايخليو توقيع وكاتبقا الورقة لاصقة فالكروسة. وعندو ميكرو خدام بالطاقة شمسية متبثة فوق الكروسة الا حبيتي تقول كلمتك بدل ما تكتبها..
الطريف فهادشي أن بعض الأشخاص لي ما كايعرفوش بعضياتهم، فتحو حوار من خلال الكروسة، بحيث كايتواصلو بيناتهم وكايجاوبو دوك الكلمات وكايرجعو يقراو شنو خلا ليهك الطرف الآخر تحت الورقة ديالهم..
المشروع طلق عليه اسم "معاملة" عايش بيه وكايترزق منو، وف نفس الوقت جعل منو سبورة متنقلة ولوحة إبداعية كايتصورو معاها الناس وكايخليو كلماتهم باساليب مختلفة وجميلة يقرأها العابرون ويجيب عنها اخرون وقد تصادفك حكمة او ابتسامة وانت تتناول الگلية وتقرأ اللوحة..
نخليكم مع الصور