الدقيق المدعم.
من يبيعه... ثمنه ... وكيف الحصول عليه.
اليوم غادي نتكلم ليكوم على موضوع جد مهم، اللي هو الدقيق المدعم، بزاف ديال الناس كيسمعوا بان الدولة كدعم الدقيق وبان الثمن ديالو كيبقى ثابت لا يتغير ، ولكن فاش كيمشيو يشريو الدقيق كيلقاوه بثمن مرتفع، حيث كاين بزاف ديال انواع الدقيق.
اليوم بغيت نوضح ليكوم شنو هو الدقيق المدعم، شكون كيبيعو وكيفاش يمكن الحصول عليه.
الدقيق المدعم هو دقيق القمح اللين، اللي كنسميوه فارينة ، الثمن ديالو فالسوق منذ مدة طويلة مكيتعداش 100 درهم للكيس الواحد 50 كلغ، والسبب هو ان الدولة كتخلص الفرق ما بين السعر ديال البيع وسعر السوق، تماما بحال السكر وغاز البوتان.
ولكن فين نقدرو نلقاو هاد الدقيق ؟
ماشي اي محل تجاري عندو حق يبيع الدقيق المدعم، بل الامر يقتصر فقط على اللي عندو رخصة خاصة بذلك تسمى الكوطا، واللي بناء عليها كيحصل كل شهر على واحد المقدار محدد من الدقيق من احدى المطاحن المرخصة لذلك، هاد الكوطا غالبا كتعطى للتجار اللي عندهوم محلات تجارية فالاحياء الهامشية اللي كيكون فيها الفقر، وكذا فالجماعات القروية، وكل كوطا كيكون محدد شكون يستافد منها مثلا قبيلة كذا ... أو جماعة كذا ... والتاجر خاصو ضروري يبيع لهاد الساكنة، وممنوع عليه يبيعو للتجار يعاودو فيه البيع او يبعوا بثمن يفوق 100 درهم.
عملية التوزيع من المطاحن الى التجار تشرف عليها لجان مختصة، وكذلك البيع للمواطنين عندما يكثر الطلب على هذا النوع من الدقيق.
اللي خص المواطن يعرفو الان فهاد السنة اللي كل المؤشرات كتقول بانها غادي تكون صعيبة، هو شكون التاجر اللي عندو الكوطا اللي يمكن ليه هو يستافد منها، هاد المعلومات يمكن يعطيهوم ليك القايد او القسم الاقتصادي والاجتماعي بالعمالة، كل مواطن من حقو يستافد، ولكن كاين اشكال هو ان الكميات المدعمة لا تكفي لكل الساكنة، هنا يمكن للسلطة تنظم عملية الاستفادة بالتناوب او جوج اسر يشركوا فكيس واحد، والاستفادة تكون مرة واحدة فالشهر.
كاين بزاف ديال الكوطات ممعروفينش عند المواطنين، وماليهوم دايرين ما بغاو، خاصنا نعرفوهوم، ونمشيو ناخذوا من عندهم الدقيق المدعم.
اللي لقى مشكل باش يحصل على هاد الدقيق يدير شكاية عند القايد او العمالة، الى ثبت انه عندو ومبغاش يعطيك، يمكن تخاذ فحقو عدة إجراءات يمكن توصل لحد حرمانه من الكوطا واسنادها لشخص آخر.
(منقول بتصرف)
0 تعليقات
أكتب لتعليق