اييه أوليدي الله يعطيك الصحة ويخلي ليك صحيحتك؟

أسبوع وعمتي لي فعمرها سبعين سنة شادة الفراش ماقادراش تنّوض من بلاصتها بسبب الزكام والأنفلوانز ديال الخريف وما خلات ما دارت ليه ووالو .. جربات كاع الوصفات التقليدية وداها ولدها عند الطبيب جوج المرات قيّد ليها شي سبعلاف ريال ديال الدوا والو .. البارح فالصباح مجمعين أنا و(مّا) في قضايا وشؤون الدار الداخلية تا كالت ليا : واش ما مشيّت تشوف عمّتك راه طايحة فالفراش مريضة.. مالها؟ جاها هاذ الريح (الروّاح) وسخّسخها .. بقيت كنفكر أش ندّي ليها معايا فاش نكون غادي نزورها فالعشية من بعد ما نسالي الخدمة، ولقيت بأن لا الفواكه ولا دانون ولا الحليب قادرين يعطوها دافع باش تنوض تقابل الدجاج ديالها إلى كان باقي فالعمر رمق، وهيّ تطيح علي فكرة جهنمية قابلة لواحد من وجوج: يا تولّي عمتي صحة سلام وتوقف على رجليها ... يا نهزّوها للمقبرة سكرانة ... فالفورماسيان لي فالخرجة ديال الفيلاج طلبت من ذيك لي خدامة فيه سيروم رخيص ديال الروّاح .. عطاتني واحد ساوي ثلاثين درهم كالت ليا هذا هو الرخيص وماكاينش فيه الرّوميز.. خلصتو من بعد من دعيت على القحبيماها بالعنوسة، وشديت الطريق عند عمتي نشوفها لَتودّع قبل ما نتسّامح معاها .. وقبل ما نوصل عندها للدار شديت الجنب ديال الطريق وخرجت السيّروم وواحد الشوية ديال الماحيا بقا عندي من سكرة السبت لي فات ، وخويت النص فالقرعة ديال السيروم فالأرض وعاودت عمرتها بالماحيا وخضّيت القرعة مزيان ورديت كولشي للعلبة بما فيها ورقة طريقة ودواعي الاستعمال .. دخلت عندها لقيتها مجبدة تنين وتنوح وتنهد تنهيدة تهلاو فبعضيتكم وحالتها حالها .. مالك أعمتي؟ غا نموت أولدي المُسامحة ؟ ألواه أعمتي راه مازال بغيناك! - شريتي الدوا.. بصبعها شَارت ليا فين حطاه .. دورت عيني فيه لقيت السيروم لي جايب أنا ما كاينش تمة وأنا نزعم لي ليها ليها .. - هاك أعمتي واحد السيرو شربي فيه ربعة المعالق كبار قبل ما تنعسي غا تصبحي مزيانة .. حطيت ذيك الأمانة بجنب راسها وبقيت نهضر معاها واحد الشوية تا جا ولدها ونضت خرجت .. مع السبعة ديال صباح اليوم كنلقا ولدها يتاصل .. هو فالحقيقة تخلعت وشداتني التبوريشة من زكّي لا تكون طرات ليها شي حاجة .. بقيت نقفقف ونترعّد قبل ما نجاوب: - ألو.. تا كنسمع ذاك الصوت الجَهوري المألوف ديال عمتي يكول: - ألو وليدي حسن .. كول ليا ذاك السيرو بشحال شريتيه راه وافقني بزااااف .. دقة ببطلة أوليدي؟ - واش وليتي بخير أعمتي؟ - إييه أوليدي الله يعطيك الصحة ويخلي ليك صحيحتك؟ - على سلامتك .. وسيري قابلي دجاجك أش ذاك تسولي على شي سيرو؟ أحيانا، ولكي نعيش، نحتاج للمجازفة. ب.س: ولدها لي عندي هنا فاش عاودت ليه اشنو درت .. خرا بالضحك وكال: هي عمّتك دابا ربعين يوم ما غادوز ليها الصلاة؟ عمتي كون مادارني الله عز وجل حيلة وسباب كون راك إنت لي تصّلي عليه دابا .. على سلامتك وسلامتي تا أنا أعمتي.