عراض بنات الناس و يضحك ويلعن

كاين واحد الكائن ما تيخلي فالنسا غا لِنسى وملي تيوصل للنسا لعندو تتولي تبان ليه مّو هي أم المؤمنين و كتبان ليه ختو هي رابعة العدوية و بنتو هي مريم العذراء و كتبان ليه مرتو بحال شي قديسة .. عند بالو لا يأتيهم الخطأ لا من دبرهم ولا من قدّامهم ..ومشي مرة ومشي جوج ومشي عشرة تنكون كالس مع شي واحد تنعرفو مزيان وتيبدا يهضر ليا على عراض بنات الناس و يضحك ويلعن ولا يشمت ويتشفى فخوها وبوها ...وتنكول مع راسي شوف دبا هاد السيد كيفاش تيهضر وحاسب عند راسو داير مزية زعما وواعر ..وهو كون دار وشاف عد جنابو غادي يلقى بنتو دايرة فالواتساب لمدايراهش مايا خليفة ولا اش كدير ملي تتمشي تقرا ...بزاف بحال هاد النوع تلقى مو ولا ختو ولا مرتو تدير شي مصايب وزبايل لميطيحوش لشيطان على بالو وهو فدار غفلون ...تنكول مع راسي شنو ذنبو هو تيتواخذ على أخطاء وحدين خراين اشنو ذنبو هو يشمتو فيه الناس وينقصو منو ولكن ملي حتى هو تتلقاه كييشمت الناس ويتكلم فأعراضهم تيولي يبان فواحد الصورة خايبة ممسوخ وملعون وقبيح الصيفة ....هدشي علمني معمرني نتكلم فبنات الناس مادام عندي ام وبنت وزوجة ووأخت . وحاجة خرى سوى عند ختك سوى لا را كل واحد وحياتو وكل وحدة وحياتها غير احنا مع قلة ميدار وبسباب عقدنا وضعفنا وأمراضنا عزيز علينا نحشرو نيوفنا فحياة الناس ونتلذو بعيوبهم ونقائصهم وأعطابهم .