الحملة على احتلال الملك العمومي

شفت هاد الأيام ما بقاتش الحملة على احتلال الملك العمومي فكازا… دغيا رجع الهدوء وغبروا شي وجوه كانت عاجباهم الحركات الاستعراضية قدّام كاميرات المواقع… هاد الشي كنت قلتو ملِّي شفت شي مسرحيات شبه هزلية ديال شي وحدين فالشهور اللي دازو… ريّب لهذا وريّب لهذا، ولكن من بعد؟ والو!!! يمكن كيتصالحو وبطريقتهم… والقهوة اللي ريّبتيها رجع شرب فيها شي "قهيوة" ومن بعد كاين شعار "ما تقيسش طروطواري"… هاد الشي فيه بزاف ديال العبث، وبزاف ديال المزاجية، وبزاف ديال أبوك صديقي، واخّا كاين القانون ولكن فتطبيق القانون كل واحد كيدير "الاجتهاد" ديالو، وفداك الاجتهاد كيوقع اللي كيوقع والفاهم يفهم! ولكن اللي ما فهمتش أنا هو شنو هي هاد الشرطة الإدارية؟ أنا كنعرف البوليس هو البوليس والشرطة هي الشرطة… وهادو ناس كيخدمو بالقانون والمساطر والمحاضر وداك الشي اللي كنعرفوه… إننا هاد الشرطة الإدارية شكون كيحكمها؟ البوليس كنعرفو فيه الحموشي وكنعرفو فيه الكوميساريات، إيوا وهاد الشرطة الإدارية شكون كيحكمها؟ فين نلقاوها؟ فين نتابعوها؟ فين نحاسبوها؟ باش نعرفو أنها كتخدم بالقانون؟ باش نعرفو بأنها كتتدخل وفق القانون؟ باش نعرفو بأنها ما كديرش التمييز وباللي كتخدم بالقهوة والشاي بالياسمين؟ أنا ما كنتهم حد غير كنسول… واخا عارف شنو كيوقع (هادوك اللي فأنفا غنرجع لهم بالتفصيل)… الحاصول هاد الشي خاصو غرفة الڤار… ولا فرار مع غرفة الڤار…